Dhule News : प्रत्येक घंटागाडीला 4 ट्रिपचे बंधन; 1 मेपासून कार्यवाही सुरू

Dhule News : शहरात पडलेला कचरा रोजच्या रोज उचलला जावा, घरोघरी दररोज कचरा संकलन व्हावे यासाठी प्रत्येक घंटागाडीने रोज किमान चार ट्रिप (फेऱ्या) कचरा संकलनाचे बंधन घालण्यात आले आहे. १ मेपासून ठेकेदाराकडून घंटागाडीचालक, कामगारांना ही सक्ती करण्यात आल्याची माहिती आहे. यापूर्वी प्रत्येक घंटागाडीला तीन ट्रिपचे बंधन होते. या नव्या नियमामुळे आता शहरात कचरा दिसणार नाही, घंटागाडीबाबत नागरिकांच्या तक्रारी होणार नाहीत, अशी अपेक्षा आहे. (Dhule Limit of 4 trips per hour for garbage truck)

शहरातील कचरा संकलनाचे काम स्वयंभू कन्स्ट्रक्शन (पुणे) या कंपनीला देण्यात आले आहे. नगरसेवकांचा कार्यकाळ असेपर्यंत कचरा संकलनाबाबत नेहमीच तक्रारी असायच्या. आज या तक्रारी कमी झाल्या असल्या तरी समस्या मिटली, असे म्हणता येत नाही. आजही कचरा संकलनाची समस्या, शहरात सार्वजनिक ठिकाणी कचऱ्याचे ढीग पाहायला मिळतात. ही समस्या दूर व्हावी, शंभर टक्के कचरा संकलन करण्याच्या सूचना आयुक्त तथा प्रशासक अमिता दगडे-पाटील यांनी ठेकेदाराला दिल्या आहेत. याबाबत नुकतीच बैठकदेखील झाली. (latest marathi news)

चार ट्रिपचे बंधन

महापालिका आयुक्त तथा प्रशासक श्रीमती दगडे-पाटील यांच्याकडे बैठक झाल्यानंतर स्वयंभू कंपनीकडून घंटागाडीवरील कर्मचाऱ्यांना रोज चार ट्रिप मारण्याच्या सूचना देण्यात आल्या आहेत. यापूर्वी तीन ट्रिपचे बंधन होते. मात्र, रोज शंभर टक्के कचरा संकलन होत नसल्याचा मुद्दा पुढे आल्याने स्वयंभूकडून १ मेपासून घंटागाडीवरील कर्मचाऱ्यांना चार ट्रिपचे बंधन घालण्यात आले आहे.

प्रत्येक घंटागाडी दिवसभरात ठरवून दिलेल्या प्रभागातून चार ट्रिप कचरा संकलन करून तो डेपोवर नेईल. यामुळे त्या-त्या प्रभागातून शंभर टक्के कचरा संकलन होईल, अशी अपेक्षा आहे. कचरा संकलनासाठी महापालिकेकडून ठेकेदाराला ६९ घंटागाड्या पुरविल्या आहेत. यातील किमान ६०-६५ घंटागाड्या रोज चालतात असा अंदाज आहे. हद्दवाढ क्षेत्रासह संपूर्ण शहरातील या घंटागाड्या कचरा संकलन करतात. प्रभागांमधून रोज डोअर-टू-डोअर कचरा संकलन व्हावे यासाठी केलेल्या या नियोजनातून तक्रारी कमी होतील, अशी अपेक्षा आहे.