Dhule News: धीरे धीरे सप्पनमा ये जो व कानबाई-रानबाई! कानुमातेच्या उत्सवाचा उत्साह अमाप

Dhule News : खानदेशात कानुबाईमातेचा उत्सव मोठ्या उत्साहात साजरा होत आहे. या उत्सवासाठी प्रत्येक गावातील लांबवर गेलेले चाकरमानीही दाखल झाले आहेत. सायंकाळी कानुमातेच्या पूजनासाठी भावकीतील मंडळींनी मोठी गर्दी गेली होती.

शनिवारी भाजी-भाकरीच्या आणि रविवारी (ता. २०) पुरणपोळीच्या रोटाने पूजन झाले. ‘धीरे धीरे सप्पनमा ये जो व कानबाई-रानबाई’ आदी गीते गात रात्रभर जागरण झाले. सोमवारी (ता. २१) सकाळी कानुमातेची विसर्जन मिरवणूक निघेल. (excitement of festival of Kanumata immeasurable Dhule News)

कानुमातेचे पूजन प्रत्येक भावकीत पारंपरिक पद्धतीने झाले. कानुमाता असलेल्या घरी पूजन करण्यासाठी वाजतगाजत रोट घेऊन येणाऱ्या दांपत्यांमध्ये भक्तिभाव ओसंडून वाहत होता.

महिला वर्ग तर कानुमातेच्या पूजनासाठी रोट करण्यासाठी दिवसभर व्यस्त होत्या. रात्री मातेचे पारंपरिक गीत गात जागरण झाले. येथील कानुमाता मंडळाचे अध्यक्ष गजू माळी, साहेबराव माळी व शांताराम माळी यांचे विविध जागरण भजन झाले.

पावसासाठी मातेला साकडे

दरम्यान, तीनदिवसीय उत्सवाची सोमवारी सांगता होईल. मिरवणुकीत आबालवृद्ध फुगडी खेळून उत्सवाचा आनंद द्विगुणित करतील. या वर्षी पावसाने दडी मारल्याने पावसासाठी मातेला साकडे घालतील.