‘एसटी’ महामंडळाचे नवे ब्रिद..प्रवाशांना देणार बाटलीबंद पाणी 

शनिमांडळ (नंदुरबार) : एसटी महामंडळाने बसस्थानकांवर बाटलीबंद पाणी विकण्याचा निर्णय घेतला आहे. त्यासाठी ‘नाथजल’ नावाचे ब्रँड असलेले बाटलीबंद पाणी तारकपूर बसस्थानकावर विक्रीसाठी उपलब्ध केले आहे. लवकरच हा ब्रँड राज्यभरातील सर्वच छोट्या-मोठ्या बसस्थानकांवर उपलब्ध होणार आहे. 
महामंडळाच्या बसस्थानकांवर इतर खासगी कंपन्या बाटलीबंद पाणी प्रवाशांना विकत आहेत. महामंडळ गेल्या काही वर्षांपासून आर्थिकदृष्ट्या तोट्यात आहे. कोरोनामुळे तो तोटा आणखी वाढला आहे. त्यामुळे कर्मचाऱ्यांचे पगार अदा करण्यासाठी सरकारची मदत महामंडळाला घ्यावी लागत आहे. महामंडळाने प्रवासी वाहतुकीशिवाय आणखी इतर व्यवसायांत उतरण्याचा निर्णय घेतला आहे. त्यानुसार मालवाहतुकीचा व्यवसाय सुरू केला आहे. या मालवाहतुकीतून काही प्रमाणात आर्थिक उत्पन्न मिळू लागले आहे. बसस्थानकांवर प्रवाशांना बाटलीबंद शुद्ध पाणी विकण्याचा निर्णय महामंडळाने घेतला आहे. त्यासाठी एका खासगी कंपनीशी करार केला आहे. 
 
बाटली मागे मिळणार एक रुपया 
संबंधित कंपनीने एसटीसाठी नाथजल नावाचा ब्रँड असलेल्या बाटल्या तयार केल्या आहेत. एका बाटलीमागे महामंडळाला एक रुपयांचा महसूल मिळणार आहे. बसस्थानकांवर एक लिटरची बाटली पंधरा रुपयांत विकली जाणार आहे. त्यापेक्षा अधिक किमतीने विक्री केल्यास संबंधित विक्रेत्यावर कार्यवाही होईल. सर्व छोट्या-मोठ्या बसस्थानकांवर हे बाटलीबंद पाणी उपलब्ध असणार आहे. 

संपादन ः राजेश सोनवणे