जळगावात "पीके'ची डान्सिंग कार...काच बंद करून चाळे

जळगाव : एम. जे. कॉलेजच्या समोरील गल्ल्यांमध्ये नेहमीच प्रेमीयुगलांचे चाळे रहिवाशांच्या त्रासाचा विषय झाला आहे. महाविद्यालयीन तरुणांच्या या प्रकारामुळे रहिवासी कमालीचे त्रस्त झाले असून, वारंवार तक्रारी करूनही उपयोग होत नाही. अशाच प्रेमीयुगलास हटकल्यावरून एका प्राध्यापकाचे हात तोडण्यात आल्याचा प्रकार अग्रवाल हॉस्पिटलच्या मागील गल्लीत घडला होता. आज याच गल्लीत "डान्सिंग कार' चाळे करणाऱ्या प्रेमी युगलास निर्भया पथकाने ताब्यात घेत रामानंद पोलिसांच्या स्वाधीन केले. 

क्‍लिक करा > थर्टी फर्स्टला पियो जी भरके... 

अमीर खानचा "पी.के' हा चित्रपट खूप गाजला. या चित्रपटात कपडे मिळवण्याचे एकमेव ठिकाण असलेल्या "डान्सिंग-कार'चा सीन वेगळी ओळख निर्माण करून गेला. जळगाव शहरात रोडरोमियो, मुलींची छेडखानी करणाऱ्या चिडीमारांसाठी निर्भयापथक कार्यरत आहे. आज दुपारच्या सुमारास नियंत्रणकक्षात एम. जे. कॉलेज परिसरातील रहिवाशांनी फोन करून अश्‍लील चाळे करणाऱ्या स्कॉर्पिओ कारची माहिती दिली. नियंत्रणकक्षाकडून निर्भया पथकाला घटनास्थळावर रवाना करण्यात आल्यावर अग्रवाल हॉस्पिटलच्या मागील गल्लीत जैन मंदिराच्या रोडवर पांढऱ्या रंगाची स्कॉर्पिओ कार उभी होती. काळ्या काचा बंद केलेल्या या वाहनास निर्भया पथकातील मंजुळा तिवारी, सहाय्यक फौजदार भिकन सोनार, अभिमन इंगळे, स्वाती पाटील अशांनी कारच्या काचा उघडण्यास सांगूनही बराचवेळ आतून प्रतिसाद मिळत नव्हता. काच फोडून टाकू असे सांगितल्यावर तरुणाने कपडे व्यवस्थित करतच काच खाली केली. थोड्यावेळात खाली उतरून या तरुणाने पथकाशी हुज्जत घालतील. त्यामुळे पोलिसांनी दोघांना कारसह रामानंदनगर पोलिस ठाण्यात आणून त्यांच्यावर प्रतिबंधात्मक कारवाई करण्यात आली. 

वाळू वाल्याचा रुबाब... 
निर्भया पथकाने चौकशी केल्यावर कारमध्ये असलेला तरुण हा बांभोरी येथील वाळू व्यावसायिक असल्याचे समजले. त्याच्या सोबत एक अल्पवयीन विद्यार्थिनी होती. पोलिस ठाण्यात आणल्यावर दोघांना कायदेशीर समज देण्यात आली. दरम्यान, कारचालक तरुणाने पोलिसांशी हुज्जत घालून आपला रुबाब पोलिसांवर काढला.