Dhule Mock Drill : मॉक ड्रील मध्ये दहशवाद्याची अ‍ॅक्टिंग करणाऱ्याला नागरिकांनी खरा दहशतवादी समजून दिला चोप

धुळे : पोलिसांकडून आयोजित करण्यात आलेल्या मॉक ड्रीलमध्ये दहशतवाद्याची भूमिका करणाऱ्या व्यक्तीला नागरिकांनी चांगलाच चोप दिल्याची घटना घडली आहे. धुळे शहरामध्ये हा प्रकार घडला असून या घटनेचा व्हिडिओ सोशल मीडियावर व्हायरल झाला आहे.

अधिक माहितीनुसार, धुळे शहरातील स्वामीनारायण मंदिरात दहशतवादी घुसले असल्याचं तेथील नागरिकांच्या लक्षात आलं. पण हे पाहून तेथील लहान मुले आणि नागरिक घाबरले आणि त्यांनी पोलिसांना ही माहिती दिली. त्यानंतर १० मिनीटांत घटनास्थळी पोलिस दाखल झाले आणि हे मॉकड्रील असल्याचं लक्षात येताच नागरिकांनी सुटकेचा नि:श्वास टाकला.

दरम्यान, या घटनेमुळे लहान मुले घाबरल्याने एका नागरिकाने दहशतवाद्याची भूमिका बजावणाऱ्याला चांगलाच चोप दिला. खरा दहशतवादी असल्याचं समजून या नागरिकाने सदर व्यक्तीला मारहाण केली असून पोलिसांनी या घटनेनंतर मारहाण करणाऱ्या व्यक्तीला ताब्यात घेतलं आहे.