हर हर भोलेचा गजर करीत 1 लाख भाविकांनी घेतले त्रंबकेश्वराचे दर्शन

नाशिक : महाराष्ट्रातील भाविकांचा पहिला श्रावण (Shravan) सोमवार व उत्तर भारतीयांचा तिसरा श्रावण सोमवार निमित्ताने ज्योतिर्लिंग दर्शनासाठी भाविकांची पहाटे पासुनच गर्दी होती.

पहाटे चार वाजताच भाविक रांगा लावून मंदिराचे प्रवेश द्वार उघडण्याची वाट पहात होते. पाच वाजता मंदिर उघडताच सर्वत्र भोलेहर व बमबम भोलेचा गजर सुरु होता. काल सारख्याच भाविकांच्या रांगा पुर्व दरवाजा व देणगी दर्शन उत्तर दरवाजात रांगा लागल्या त्या काल पेक्षा जास्त लांबीच्या होत्या. (1 lakh devotees took darshan of Trimbakeshwar nashik Latest Marathi News)

आज देखील प्रती माणूस दोनशे रुपयांची रांग मोठी होती. सकाळी कडक उन तर दुपारी श्रावण सरी पडल्याने भाविकांच्या उत्साहात भर पडली होती. उपवासाचा दिवस असल्याने फळे व उपवासाच्या पदार्थांना चांगली मागणी होती.

दुपारी तीन वाजेला त्रंबकेश्वराच्या पंचमुखी सुवर्ण मुखवटा ठेवून पालखी काढण्यात आली. पालखी समवेत विश्वस्त प्रशांत गायधनी, संतोष कदम, तृप्ती धारणे, पंकज भुतडा, भुषण अडसरे उपस्थित होते.

पालखी मेन रोड मार्गे कुशावर्त तीर्थावर नेण्यात आली. तेथे अभिषेक पुजा करुन पुन्हा त्रंबकेश्वर मंदिरात व कोठी हाॅलमध्ये नेण्यात आली.

ब्रह्मगिरी प्रदक्षिणेसाठी काही भाविक पहाटेच जात होते. दोन वर्षे मंदिरे बंद असल्याने ह्या वर्षी भाविकांचा ओघ वाढला आहे. त्याच प्रमाणात गैरसोयी वाढल्याचे दिसुन येत आहे. भाविकांना सुलभ दर्शन व शांततेत अभिषेक पुजा व तत्सम ध्यानधारणा करण्यासाठी व्यवस्था असावी अशी माफक अपेक्षा असली तरी ती करण्यासाठी त्याच पध्दतीने कार्यप्रणाली व्हावी अशी भक्त भावना व्यक्त करीत आहेत. आज वाहनतळ शहराच्या बाहेर दुरवर नेल्याने वृध्द व आजारी यांचे हाल झाले.