चक्क 1 रुपयात 1 लिटर पेट्रोलची ऑफर! पेट्रोलपंपावर तोबा गर्दी

सिडको (नाशिक) : एकीकडे पेट्रोलचे (petrol) भाव गगनाला भिडले असताना, दुसरीकडे नाशिकमध्ये मात्र ‘एक रुपयात एक लिटर पेट्रोल’ ची घोषणा ऐकू येताच सर्व वाहनधारकांच्या गाड्या पेट्रोलपंपाकडे वळल्या आणि एकच गर्दी पाहायला मिळाली. जमलेली गर्दी पाहून कोणाला कळेच ना की नेमकं काय सुरू आहे?

पेट्रोलपंपावर वाहनधारकांची चांगलीच झुंबड

राष्ट्रवादी काँग्रेसच्या शहर उपाध्यक्षांनी आपल्या वाढदिवसाचे औचित्य साधून केवळ ‘एक रुपयात, एक लिटर पेट्रोल’ची ऑफर दिल्याने अंबडमधील एका पेट्रोलपंपावर वाहनधारकांनी पेट्रोल भरण्यासाठी तोबा गर्दी केल्याचे चित्र बघायला मिळाले. मागील पंचवार्षिक निवडणुकीत प्रभाग २७ मधून अवघ्या काही मतांनी निसटता पराभव झालेले व सध्या पुन्हा एकदा राष्ट्रवादी काँग्रेसकडून नगरसेवकपदासाठी इच्छुक असलेले प्रशांत खरात यांनी गुरुवारी (ता. २०) आपल्या वाढदिवसाचे औचित्य साधून ‘एक रुपयात एक लिटर पेट्रोल’ भरण्याची भन्नाट कल्पना लढविली. त्यांच्या या आवाहनाला वाहनधारक व समर्थकांचा प्रचंड प्रतिसाद मिळाला. अंबड औद्योगिक वसाहतीमधील ठरवून दिलेल्या एका पेट्रोलपंपावर वाहनधारकांची चांगलीच झुंबड उडाली होती.

दुपारनंतर ही ‘ऑफर’ बंद करण्यात आली

येथे मोठ्या प्रमाणात गर्दी वाढल्याने दुपारनंतर ही ‘ऑफर’ बंद करण्यात आली. तोपर्यंत शेकडो लिटर पेट्रोल वाहनधारकांनी भरल्याचा दावा दस्तुरखुद्द बर्थडे बॉय प्रशांत खरात यांनी केला आहे अखेर दुपारी बारानंतर हा यशस्वी प्रयोग बंद केल्याने गर्दी निवळली.