Nashik Dengue News: शहरात नव्याने डेंगीचे 150 रुग्ण

Nashik Dengue News : डिसेंबरच्या दोन आठवड्यात शहरात नव्याने डेंगीचे दीडशे रुग्ण आढळून आले आहे. बाधित त्यांची संख्या एकूण ११३५ झाली आहे.

त्या व्यतिरिक्त डेंगीने तीन बळी गेले असून, वैद्यकीय विभागाचा डेंगीची स्थिती नियंत्रणात असल्याचा दावा फोल ठरला आहे. (150 new cases of dengue in city nashik news)

मुख्यत्वे ऑक्टोबर व नोव्हेंबर महिन्यात पावसाळा संपल्यानंतर डेंगीचा प्रादुर्भाव जाणवतो. यंदा डिसेंबरमध्येदेखील डेंगीने कहर कायम ठेवला आहे. ऑगस्ट महिन्यात डेंगीचे ४७ रुग्ण होते. त्यानंतर रुग्णांची संख्या वाढत गेली. सप्टेंबर महिन्यात २६१ रुग्ण आढळून आले, तर ऑक्टोबर महिन्यात १९३ बाधित आढळले.

नोव्हेंबर महिन्यात पावणेतीनशे नागरिकांना डेंगीची बाधा झाली. डिसेंबरच्या पहिल्या दोन आठवड्यात दीडशे नवीन बाधित रुग्ण आढळले आहे.

एकूण डेंगी बाधितांची संख्या ११३५ वर गेली आहे. ऑक्टोबर महिन्यात नाशिक रोड विभागातील आनंदनगर परिसरातील एकाचा डेंगीने मृत्यू झाला.

त्यानंतर नोव्हेंबर महिन्यात सिडकोतील डीजीपीनगर कामटवाडे भागातील, तर पंचवटीच्या म्हसरूळ विभागातील ६५ वर्षीय वृद्ध महिलेला डेंगीची लागण होऊन मृत्यू झाला. शहरात आतापर्यंत डेंगीने तिघांचा बळी घेतला आहे.