Nashik Bribe Crime : लाचखोर सागर डगळे यास 2 दिवसांची पोलिस कोठडी

Nashik Bribe Crime: उपनगर पोलिस ठाण्यात दाखल अपहरणाच्या गुन्ह्याच्या तपासात वाहन आणि जेवणाच्या खर्चापोटी सात हजाराची लाच स्वीकारणाऱ्या सहाय्यक पोलिस निरीक्षकास जिल्हा व सत्र न्यायालयाने दोन दिवसांची पोलिस कोठडी सुनावली.

बुधवारी (ता.३) सायंकाळी जिल्हा रूग्णालय आवारात सदरची कारवाई लाचलुचपत प्रतिबंधक विभागाने केली होती. (2 days police custody for briber Sagar Dagle Nashik Bribe Crime news)

सागर गंगाराम डगळे (३८) असे कोठडी सुनावण्यात आलेल्या सहाय्यक पोलिस निरीक्षकाचे नाव आहे. डगळे उपनगर पोलिस ठाण्यात कार्यरत आहे. नाशिक रोड परिसरातील तरुणावर प्रेमप्रकरणातून अल्पवयीन मुलीस पळवून नेल्याप्रकरणी उपनगर पोलिस ठाण्यात अपहरणाचा गुन्हा दाखल आहे.

या गुन्ह्याचा तपास डगळे यांच्याकडे होता. या गुन्ह्याच्या तपासासाठी पुणे येथे जावे लागणार असल्याचे सांगून डगळे यांनी संशयित तरुणाच्या भावाकडे दहा हजार रुपयांची मागणी केली होती. वाहन आणि जेवणाच्या खर्चापोटी ही लाच मागण्यात आली होती.

हेही वाचा : संतुलित आहारातून रोखा फॅटी लिव्हरचा आजार

तक्रारदाराने तीन हजाराची रक्कम ऑनलाइन यापूर्वीच दिली होती. उर्वरित रक्कम देण्याची ग्वाही देत तक्रारदाराने लाचलुचपत प्रतिबंधक विभागाशी संपर्क साधला होता. या घटनेची दखल घेत लाचलुचपत प्रतिबंधक पथकाने बुधवारी (ता. ३) सायंकाळी जिल्हा रूग्णालय आवारात सापळा लावून डगळे यास रंगेहाथ जेरबंद केले.

न्यायालयाने त्यास दोन दिवस पोलिस कोठडी सुनावली आहे. दरम्यान पथकाने संशयिताची घरझडती घेतली असून, त्यात अद्याप काही हाती लागले नसल्याची माहिती सूत्रांनी दिली.