Corona Updates : दिवसभरात 47 पॉझिटिव्‍ह; 210 बाधितांवर उपचार सुरु

नाशिक : जिल्ह्या‍‍त नव्‍याने आढळणाऱ्या बाधितांच्या (Corona patients) संख्येत चिंताजनकरीत्या वाढ होत आहे. मंगळवारी (ता.२१) जिल्ह्या‍‍त ४७ रुग्‍णांचे कोरोनाचे अहवाल पॉझिटिव्‍ह (Positive) आले. पंधरा रुग्‍णांनी कोरोनावर यशस्‍वीरीत्‍या मात केली. यातून ॲक्‍टिव्‍ह रुग्‍ण संख्येत ३२ ने वाढ झाली असून, सद्यःस्‍थितीत उपचार घेणाऱ्या बाधितांची संख्या २१० झाली आहे. कोरोनाच्‍या तिसरी लाट ओसरल्‍यानंतर प्रथमच सक्रिय रुग्‍ण संख्येचा आकडा दोनशेपार गेला आहे. (47 corona positive throughout day Nashik corona update News)

नाशिक महापालिका क्षेत्रात आढळणाऱ्या बाधितांच्‍या संख्येत होणारी वाढ शहरवासीयांसाठी चिंता वाढविणारी ठरू शकते. मंगळवारी या क्षेत्रात ३८ रुग्‍णांचे कोरोनाचे अहवाल पॉझिटिव्‍ह आले. नाशिक ग्रामीणमधील सात, तर जिल्‍हा बाहेरील दोन रुग्‍णांना कोरोनाची लागण झाल्‍याचे निदान झाले. मालेगाव महापालिका क्षेत्रात नव्‍याने बाधित आढळून आला नाही. जिल्ह्याचा पॉझिटिव्‍हीटी दर ३.१० टक्‍के राहिला. तर नाशिक महापालिका क्षेत्राचा पॉझिटिव्‍हीटी दर वाढून ६.३८ टक्‍के झाला आहे.

प्रलंबित अहवालांच्‍या संख्येत पुन्‍हा वाढ झाली आहे. सायंकाळी उशिरापर्यंत ७३५ रुग्‍णांना अहवालाची प्रतीक्षा होती. नाशिक ग्रामीणमधील ५४४, नाशिक शहरातील १३७, मालेगाव महापालिका क्षेत्रातील ५४ रुग्‍णांना अहवालाची प्रतीक्षा कायम होती. सध्या उपचार घेत असलेल्‍या सक्रिय रुग्‍णांपैकी तीन बाधितांना उपचारादरम्‍यान ऑक्‍सिजनची आवश्‍यकता भासत आहे. ४२ बाधितांमध्ये कोरोनाची लक्षणे आढळून आलेली आहेत.

ॲक्‍टिव्‍ह रुग्‍ण संख्येची स्‍थिती-

नाशिक महापालिका---------१३७

नाशिक ग्रामीण--------------६५

मालेगाव महापालिका--------१

जिल्‍हा बाहेरील-------------७