पोलीस कर्मचाऱ्यावर हल्ला करणाऱ्या आरोपीस शिक्षा

नाशिक : आपले कर्तव्य बजावत असलेल्या पोलिस कर्मचाऱ्यास शिवीगाळ करून त्याच्यावर चॉपरने हल्ला करत जखमी करणाऱ्या आरोपीस जिल्हा व सत्र न्यायालयाने तीन महिने सश्रम कारावास आणि एक हजार रुपये दंडाची शिक्षा ठोठावली आहे. विनोद निवृत्ती आगळे (४०, रा. आगळे चाळ, पंचवटी), असे या आरोपीचे नाव आहे.

२८ नोव्हेंबर २०१८ रोजी पंचवटी परिसरात असलेल्या मनपा शाळा क्रमांक १० येथे पोलिस नाईक माधव सांगळे आणि त्यांच्यासोबत असलेले पोलिस कर्मचारी श्री. आहेर हे कर्तव्य बजावण्यासाठी गेले होते. येथे असलेल्या आरोपी विनोद आगळे याने पोलिस कर्मचाऱ्यांना शिवीगाळ करत धक्काबुक्की केली. यानंतर त्याने आपल्याजवळील चॉपर काढत माधव सांगळे यांच्यावर हातावर वार करत त्यांना जखमी केले. याप्रकरणी पंचवटी पोलिस ठाण्यात विनोद आगळे याच्याविरुद्ध गुन्हा दाखल करण्यात आला आहे.

तत्कालीन सहाय्यक पोलिस निरीक्षक व्ही. डी. शार्दूल यांनी या प्रकरणाचा सखोल तपास करत दोषारोपपत्र न्यायालयात सादर केले होते. जिल्हा व सत्र न्यायालय न्यायाधीश आर. आर. राठी यांच्या न्यायालयात या प्रकरणाची सुनावणी झाली. फिर्यादी, पंच, साक्षीदार यांची दिलेली साक्ष, तपास अधिकारी यांना सादर केलेले सबळ पुरावे ग्राह्य धरुन न्यायालयाने विनोद आगळे यास ३ महिने सश्रम कारावास आणि १ हजार रुपये दंडाची शिक्षा ठोठावली. सरकारी पक्षातर्फे वकील योगेश कापसे यांनी कामकाज पाहिले.