Adivasi Vikas Bhavan : ‘राजपत्रित’चा पदभार कनिष्ठ कर्मचाऱ्याकडे

नाशिक : आदिवासी विकास भवनात असलेल्या वरिष्ठ अधिकाऱ्यांनी आपल्या कार्यालयातील अधिकाऱ्यांच्या अधिकारावर मर्यादा टाकत काही अधिकाऱ्यांचे पदभार काढून घेतले. प्रकल्प अधिकारी यांनी केलेल्या या कारवाईमुळे आदिवासी विकास विभागात या कारवाईची चांगलीच चर्चा झाली. या कारवाईत राजपत्रित अधिकाऱ्याचे पदभार थेट कनिष्ठ कर्मचाऱ्यास देत त्यांच्याकडील पदभार रात्रपत्रित अधिकाऱ्यास देत खच्चीकरण केले आहे. (Adivasi Vikas Bhavan news responsibility shifted of Gazette officer to Junior Staff Nashik Latest Marathi News)

राजपत्रित अधिकाऱ्याचा पदभार हा कनिष्ठ कर्मचारी याकडे देणे हे कितपत योग्य, अशीच चर्चा इतर विभागातील अधिकाऱ्यांमध्ये होती. आदिवासी विकास विभागातच प्रकल्प कार्यालय आहे. या कार्यालयात कार्यरत असलेल्या दोघा राजपत्रित अधिकारी व एका अधिकारी यांचा पदभार आणि अधिकार हे प्रकल्प अधिकारी यांनी आपल्या अधिकारांचा वापर करत तडकाफडकी काढून घेत ते कनिष्ठ कर्मचाऱ्यासह इतर राजपत्रित अधिकाऱ्यांकडे दिले.

यात विकास विभागाचा कार्यभार हा गृहपालाकडे सोपविण्यात आला आहे. लेखा विभागाच्या अधिकाऱ्यांच्या कामावर मर्यादा टाकल्या आहेत. ही कारवाई करताना या अधिकाऱ्यांविरुद्ध कसलीही तक्रार नसल्याची चर्चा विभागात आहे.

यापूर्वीही गंभीर असाच प्रकार

यापूर्वी प्रकल्प अधिकाऱ्यांनी आपल्या अधिकारांचा वापर करत एक परिपत्रक काढले होते. या परिपत्रकामध्ये आश्रमशाळेमधील विद्याथी, विद्यार्थिनी यांची सुरक्षेच्या दृष्टिकोनातून व आदिवासी विकास विभागाची प्रतिमा मलिन होऊ नये म्हणून कुठल्याही संघटना, संस्था पदाधिकारी, कार्यकर्ते, त्रयस्थ व्यक्ती यांना थेट प्रवेश देता कामा नये, तसेच पत्रकार यांना वृत्तांकन करण्यापासून मज्जाव करणे असे आदेश सर्व आश्रमशाळा मुख्याध्यापक यांना दिले होते. प्रकल्प अधिकारी यांनी काढलेल्या या निर्णयाची देखील चांगलीच चर्चा विभागात झाली होती.