कोरोनामुळे मृत कर्मचाऱ्यांच्या माहितीसाठी प्रशासनाची धावाधाव

नाशिक : कोरोनामुळे (corona virus) मृत झालेल्या महापालिकेच्या कर्मचाऱ्यांची माहिती मिळविण्यासाठी प्रशासनाची धावाधाव सुरू असून, ३८ विभागांना नोटिसा पाठवून कर्तव्यावर असताना कोरोनामुळे मृत झालेल्या कर्मचाऱ्यांची यादी सादर करण्याच्या सूचना देण्यात आल्या. (administration-for-information-on-dead-employees)

३८ विभागांना नोटिसा

मार्च, एप्रिलमध्ये शहरात मोठ्या प्रमाणात कोरोना संसर्गाचा प्रादुर्भाव झाला. मृतांची संख्यादेखील झपाट्याने वाढली. एप्रिलमध्ये एक ते सोळा तारखेपर्यंत दोन हजार ३०० हून अधिक मृतदेहांवर अंत्यसंस्कार करण्यात आले असताना प्रशासनाकडे फक्त ७५९ रुग्णांची नोंद करण्यात आली होती. महासभेत या विषयावर नगरसेवकांनी मृत कर्मचाऱ्यांची आकडेवारी विचारल्यानंतर आरोग्य व वैद्यकीय विभागाकडून टोलवाटोलवी करण्यात आली. महापौर सतीश कुलकर्णी यांनी मृतांची आकडेवारी सादर करण्याच्या सूचना दिल्यानंतर प्रशासन उपायुक्त मनोज घोडे-पाटील यांनी ३८ विभागांना पत्र लिहून कोरोनामुळे मृत झालेल्या कर्मचाऱ्यांची आकडेवारी सादर करण्याच्या सूचना दिल्या.