Nashik Sports News : ‘भारत- अ’ विरुद्ध अंतिम सामन्‍यात ईश्‍वरी सावकार च्‍या सर्वाधिक धावा

नाशिक : श्रीलंका, वेस्ट इंडिज, भारत-अ आणि भारत- ब या संघांतील चौरंगी मालिकेत नाशिकच्‍या ईश्‍वरी सावकारने भारत- ब संघात स्‍थान मिळविले होते. स्‍पर्धेदरम्‍यान उत्‍कृष्ट प्रदर्शन करणाऱ्या ईश्‍वरी सावकारने भारत-अ संघाविरुद्धच्‍या अंतिम सामन्‍यात आपल्‍या संघाकडून सर्वाधिक ३६ धावांचे योगदान दिले.

भारतीय क्रिकेट नियामक मंडळ (बीसीसीआय) तर्फे आयोजित १९ वर्षांखालील महिला टी- ट्वेंटी चौरंगी मालिका वायझॅग इथे पार पडली. या स्‍पर्धेतील अंतिम सामन्‍यात प्रथम फलंदाजी करत भारत- ब संघाने २० षटकांत ७ बाद १२९ धावा केल्या. (BCCI organized india women T Twenty cricket competition winner nashik women cricketer Ishwari Savkar Nashik Sports News)

यामध्ये नाशिकच्‍या ईश्वरी सावकारने ३९ चेंडूत ६ चौकारांसह ३६ धावांचे सर्वाधिक योगदान दिले व १०.५ षटकांत ७७ धावांची सलामी दिली. विजयासाठी १३० धावा श्वेता शेरावतच्या ४३ धावांच्या जोरावर भारत-अ संघाने १८.३ षटकांत पूर्ण करताना हा सामना सात गडी राखून जिंकला.

स्‍पर्धेदरम्‍यान ईश्‍वरीने भारत-ब संघातर्फे सलामीला येत चारही सामन्यात सातत्यपूर्ण फलंदाजीचे प्रदर्शन घडवले. श्रीलंकेविरुद्ध ४८ चेंडूत ३० धावा, वेस्ट इंडिजविरुद्ध २६ चेंडूत ३२ धावा, भारत अ संघाविरुद्ध ३२ चेंडूत ३६ आणि अंतिम सामन्यात ३९ चेंडूत ३६ धावा अशी प्रभावी कामगिरी केली आहे.