सत्ताधारी भाजपला घरचा आहेर; भाजप नगरसेवकाकडूनच इशारा

नाशिक : आगामी महापालिका निवडणुकीच्या (muncipal corporation elections) पार्श्‍वभूमीवर विकासकामांचा बार उडविण्याची घोषणा अंदाजपत्रकात करण्यात आली असली तरी अद्याप कामांना सुरवात न झाल्याने सत्ताधारी भाजपच्या नगरसेवकांमध्येच अस्वस्थता निर्माण झाली आहे. मतदारांशी प्रतारणा करता येणार नसल्याचे सांगताना कामे न झाल्यास आंदोलन करू, असा इशारा भाजपचे नगरसेवक संभाजी मोरुस्कर यांनी देत सत्ताधारी भाजपला घरचा आहेर दिला. (BJP-corporator-warns-ruling-BJP-nashik-marathi-news)

सत्ताधारी भाजपला घरचा आहेर

पूर्ण बहुमताने महापालिकेत भाजपची सत्ता आल्यानंतर विकासकामे वेगाने पुढे जातील, अशी अपेक्षा फोल ठरली. साडे चार वर्षांपासून सर्वपक्षीय नगरसेवक विकासकामांसाठी ओरड करत असताना भाजपकडून त्यावर तिखट शब्दात प्रत्युत्तर दिले जाते, परंतु माजी गटनेते व भाजपचे ज्येष्ठ नगरसेवक संभाजी मोरुस्कर यांनी शुक्रवारी (ता.१८) विकासकामांवरून महापौर कुलकर्णी यांना धारेवर धरल्यानंतर सत्ताधारी भाजपची पंचाईत झाली. चालू आर्थिक वर्षाचे प्रशासन, स्थायी समिती व महासभेचे अंदाजपत्रक मंजूर झाले असताना अद्यापही कामांना सुरवात नाही. पावसाळ्यात कामे बंद राहतात. पावसाळा संपल्यानंतर निवडणुकीची तयारी करावी लागणार आहे. त्यापूर्वी किमान कामांच्या कार्यारंभ आदेश ठेकेदारांना मिळणे गरजेचे असल्याचे मत श्री. मोरुस्कर यांनी मांडताना महापालिकेत सत्ता असली तरी निवडणुकीत नागरिकांना दिलेल्या आश्‍वासनांची वचनपूर्ती करावी लागणार आहे. मतदारांशी प्रतारणा करता येणार नाही. विकासकामे झालीच पाहिजे अन्यथा आंदोलन करण्याचा इशारा त्यांनी दिला. शहरात महाराष्ट्र नॅचरल गॅस कंपनीकडून मोठ्या प्रमाणात रस्त्यांची खोदाई करण्यात आली. त्याबदल्यात महापालिकेकडे तोडफोड खर्च अदा करण्यात आला आहे, त्यातून तातडीने रस्त्यांची दुरुस्तीची मागणी त्यांनी केली.

महापालिकेत भाजपची सत्ता असली हे मान्य असले तरी मतदारांना दिलेल्या वचनांची पूर्तता करणे महत्त्वाचे आहे. अन्यथा प्रतारणा होईल. त्यामुळे आंदोलनाची भूमिका घ्यावी लागली. - संभाजी मोरुस्कर, माजी गटनेता, भाजप.