Nashik Crime: अनोळखी व्यक्तीचा मृतदेह आढळून आल्याने खळबळ; ओळख पटविण्याचे पोलिसांपुढे आव्हान

अंबासन : चोंढी (ता.मालेगाव) येथील शिव टेकडी मंदिरानजीक अनोळखी व्यक्तीचा मृतदेह आढळून आल्याने एकच खळबळ उडाली. (body of an unknown person was found nashik news)

पोलिसांकडून मिळालेल्या माहितीनुसार चोंढी येथील शिवटेकडी मंदिरानजीक एका व्यक्तीचा मृतदेह असल्याचा भ्रमणध्वनीव्दारे माहिती मिळताच मालेगाव तालुका पोलिस ठाण्यातील पोलीस कर्मचाऱ्यांनी तात्काळ घटनास्थळी दाखल होत पाहणी केली.

एका रूग्णावाहिकेतून सदर मृतदेह उत्तरीय तपासणीसाठी सामान्य रुग्णालयात दाखल केला. वैद्यकीय आधिकारी डाॅ. अनुसया यांनी तपासणी केली. मृतदेहाच्या नातेवाईकांचा शोध घेण्यासाठी पोलिसांसमोर मोठे आव्हान असून सदर इसमाचे वय अंदाजे पन्नास ते पंचावन्न आहे.

रंगाने काळसर, उंची पाच फुट, शरीराने सडपातळ, चेहरा लांबट व दाढीचे, डोक्यावर केस वाढलेले, अंगात लालसर रंगाचे स्वेटर, तपकिरी रंगाची नाईट पॅट व पायात काळसर रंगाचे शाॅक्स, उजव्या हातावर होम चिन्ह व साक्षी नाव गोंदण केलेले असून याबाबत कोणाला माहिती मिळताच तालुका पोलीस ठाण्यात संपर्क साधावा असे आवाहन मालेगाव तालुका पोलीसांकडून करण्यात आले आहे.