बोहल्यावर चढण्यापूर्वी ‘तिने’ चालवली बैलगाडी

नरकोळ (जि. नाशिक) : कोरोना संकटामुळे संपूर्ण जगाचीच घडी विस्कटली आहे. सर्वत्र नकारात्मक वातावरण पहायला मिळत आहे, कोरोनाचा प्रादुर्भाव रोखण्यासाठी अनेक ठिकाणी लॉकडाउन करण्यात आल्याने अनेक लग्नसोहळे लांबणीवर पडले होते. दरम्यान अलिकडे बऱ्याच ठिकाणी अनोखे विवाह सोहळे साजरे झाल्याचे बघायला मिळतात. हेलिकॉप्टरमधून वधुला नेले जात असल्याचे चित्र अनेकदा बघायला मिळते. मात्र, बागलाण तालुक्यात वधूने बैलगाडी चालवून उपस्थितांचे लक्ष वेधले. (bride drives a bullock cart in kersane nashik)

जीवनातील सर्वात महत्वाचा आनंदाचा क्षण हा विवाहसोहळ्याचा असतो. या सोहळ्यात कुटुंबातील सर्व सदस्य सहभागी होतात. मुलगा, मुलगी समान मानून सर्व कार्य धुमधडाक्यात होते. असाच एक विवाहसोहळा केरसाणे (ता. बागलाण येथे पार पडला. मांडवाच्या दिवशी शेतकरी कन्येने मांडवाची बैलगाडी चालवून उपस्थितांना अवाक्‌ केले. आयटी इंजिनिअर असलेल्या या वधूने चक्क बैलांचा कासरा हातात घेऊन बैलगाडी चालवली. त्यामुळे या कृषिकन्येचे सर्वांनी कौतूक केले.

मी आयटी इंजिनिअर असली तरी एका शेतकऱ्याची मुलगी आहे. या उद्देशाने मला बैलगाडी चालविताना फार आनंद झाला. तोही माझ्या विवाह सोहळ्याच्या दिवशी. हा क्षण मी कधीही विसरू शकत नाही.

- प्राजक्ता अहिरे, नववधू, केरसाणे (ता. सटाणा)

(bride drives a bullock cart in narkol nashik)