Nashik Unseasonal Rain : जिल्ह्यात पावसाची शक्यता; द्राक्ष उत्पादक शेतकरी धास्तावले

Nashik Unseasonal Rain : जिल्ह्यात दोन दिवसांपासून थंडीचा कडका जाणवत असतानाच हवामानात बदल झाला आहे. शुक्रवारपासून अनेक भागात ढगाळ वातावरण दिसून आले.

शेजारील अहमदनगर जिल्ह्यात अवकाळी पावसाने हजेरी लावली आहे. (Chance of unseasonal rain in district nashik news)

भारतीय हवामान विभागाच्या प्रादेशिक हवामान केंद्राकडून प्राप्त अंदाजानुसार जिल्ह्यात पुढील तीन दिवसाचा अंदाज लक्षात घेत ७ ते ९ जानेवारीदरम्यान हलक्या पावसाची शक्यता आहे. तसेच उर्वरित दिवस हवामान कोरडे राहण्याची शक्यता आहे, अशी माहिती महात्मा फुले कृषी विद्यापीठ-विभागीय कृषी संशोधन केंद्र, इगतपुरी यांच्या कृषी हवामान प्रक्षेत्र विभागाकडून देण्यात आली आहे.

शनिवारी (ता.६) ते १० जानेवारी दरम्यान प्राप्त अंदाजानुसार आकाश पुढील पाच दिवस ढगाळ वातावरण राहील. कमाल तापमान २९-३० अंश सेल्सिअस सेंटीमीटर व किमान तापमान १३-१४ अंश सेल्सिअस तसेच वाऱ्याचा वेग ७-१३ किलोमीटर तास या दरम्यान राहण्याची शक्यता आहे. यामुळे ७ ते ९ जानेवारी दरम्यान हलक्या पावसाचा अंदाज वर्तविण्यात येत आहे.

दोन दिवसांपासून ढगाळ वातावरण झाल्याने द्राक्ष उत्पादक शेतकरी धास्तावला आहे. यात पावसाचा अंदाज वर्तविल्याने द्राक्ष उत्पादक शेतकऱ्यांमध्ये घबराट पसरली आहे. कापणी व मळणी केलेले पिकांना प्लास्टिक पेपर किंवा ताडपत्रीने झाकावे किंवा सुरक्षित जागेवर ठेवावे, असा सल्ला शेतकऱ्यांना देण्यात आला आहे.

ढगाळ व पावसाळी वातावरण ओसरल्यानंतर ११ जानेवारी, अमावास्येपासून, उत्तर भारतातून उत्तर व ईशान्य दिशेकडून थंड कोरडे वारे घुसण्याच्या शक्यतेमुळे महाराष्ट्रात पुन्हा थंडीची शक्यता आहे, हवामानतज्ज्ञांनी व्यक्त केली आहे.