Nashik Child labor Crime: गरीब नवाज हॉटेलमध्ये आढळले बालकामगार; गुन्हा दाखल

Nashik Child labor Crime : बालकामगार विरोधी पथकाने धाड टाकत भद्रकाली परिसरातील गरीब नवाज हॉटेलवर कारवाई केली. या वेळी हॉटेलमध्ये दोन बालकामगार आढळून आले.

याप्रकरणी दुकान निरीक्षक विशाल प्रल्हाद जोगी यांच्या फिर्यादीवरून हॉटेलमालकाविरुद्ध गुन्हा दाखल करण्यात आला आहे. (Child labor found in Garib Nawaz Hotel Filed case nashik Crime news)

भद्रकाली पोलिस ठाणे हद्दीतील विविध आस्थापनांमध्ये काम करणाऱ्या बालकामगारांची मुक्तता करण्यासाठी कृती दलामार्फत मंगळवारी (ता. १३) धाडसत्र राबविण्यात आले. त्यानुसार कामगार उपायुक्त कार्यालयातून भद्रकालीचे वरिष्ठ पोलिस निरीक्षकांना कर्मचारी उपलब्ध करून देण्याबाबत पत्र देण्यात आले.

पोलिस कर्मचारी, तसेच पंच जिल्हा महिला व बालविकास कार्यालयाचे हर्षवर्धन पवार, सामाजिक कार्यकर्ते विजय माळी यांनी कारवाई केली. पथकाने गरीब नवाज हॉटेलमध्ये छापा घातला असता, दोन बालकामगार साफसफाई व वेटरचे काम करताना मिळून आले.

हेही वाचा : Credit Card फसवणूक....काय घ्याल काळजी?

हॉटेलमालक नदीम याकूब तांबोळी बालकामगारांकडून कमी वेतनात जास्त श्रमाचे काम करून शोषण करीत असल्याचे निदर्शनास आले. मुक्त केलेल्या बालकामगारांना बालगृह, उंटवाडी रोड येथे दाखल केले.

बालकामगार विरोधी भरारी पथकाकडून मोहीम अधिक तीव्र राबविण्याचे आदेश जिल्हाधिकारी कार्यालयाने दिले असल्याचे कामगार उपायुक्त विकास माळी यांनी सांगितले.