Nashik Crime News : शहर पोलिसांकडून 61 किलो गांजा हस्तगत

नाशिक : शहरात गांजा विक्री करणाऱ्यासाठी आलेल्या दोघांना आडगाव शिवारात सापळा रचून अटक करण्यात आली. संशयितांकडून ६१. १४० किलो गांजासह दोन कार असा साडेचौदा लाखांचा मुद्देमाल जप्त करण्यात आला आहे. याप्रकरणी आडगाव पोलिसात गुन्हा दाखल करण्यात आला आहे. सदर कारवाई शहर गुन्हे शाखेच्या युनिट एकच्या पथकाने केली. (City police seized 61 kg of ganja at adgaon area 2 arrested Nashik Latest Crime News)

रशीद गुलाब मन्सूरी (४२, रा. माळी गल्ली, पिंपळगाव बसवंत, ता. निफाड, जि. नाशिक), प्रीतिश आनंदा जाधव (३१, रा. जाधव मळा, जकात नाकामागे, आडगाव शिवार, नाशिक), अशी अटक केलेल्या संशयितांची नावे आहेत. शहर गुन्हे शाखा युनिट एकचे अंमलदार विशाल देवरे यांना आडगाव शिवारात दोन संशयित गांजा विक्री करण्यासाठी येणार असल्याची खबर मिळाली होती.

त्याची माहिती युनिट एकचे निरीक्षक विजय ढमाळ यांना दिल्यानंतर त्यांच्या मार्गदर्शनाखाली आडगाव शिवारातील जाधव मळा परिसरात सापळा रचला. या वेळी जकात नाक्याच्या मागे असलेल्या जाधव मळ्यात संशयित हे दोघे कारमध्ये (एमएच- ४६- एक्स- ५०५२) असलेला गांजा वॅगेनार कारमध्ये (एमएच ०२ बीडी ९०५२) ठेवत होते. दबा धरून असलेल्या पथकाने छापा टाकत दोघा संशयितांना ताब्यात घेतले.

तसेच घटनास्थळावरून १४ किलो १४० ग्रॅम गांजा व दोन कार, दोन मोबाईल असा १४ लाख ५३ हजार ६८० रुपयांचा मुद्देमाल जप्त केला आहे. सदर कामगिरी युनिट एकचे उपनिरीक्षक विष्णू उगले, सहायक उपनिरीक्षक रवींद्र बागूल, किरण शिरसाट, प्रवीण कोकाटे, नाजीम पठाण, प्रदीप म्हसदे, योगीराज गायकवाड, शरद सोनवणे यांनी बजावली आहे. याप्रकरणी आडगाव पोलिसात एनडीपीएस कायद्यान्वये गुन्हा दाखल करण्यात आला आहे.