SAKAL Impact News : गुटख्याच्या ‘विशाल’ कारवाईची आयुक्तांकडून चौकशी

नाशिक : रविवारी (ता. २९) अंबड पोलिस ठाण्याच्या हद्दीमध्ये गुटख्याची विशाल कारवाई करून संशयितांना नाशिक रोडला नेण्यात आले.

त्यानंतर चिरीमिरीची प्रक्रिया पार पाडून भलत्यावरच गुन्हा दाखल केल्या प्रकरणाची पोलिस आयुक्तांनी चौकशीचे आदेश बजावले आहेत. त्यानुसार, या कारवाईतील सामील असलेल्यांकडून परिमंडळ दोन उपायुक्तांनी खुलासे मागविले आहेत. (Commissioner inquiry into huge operation of Gutkha SAKAL Impact News nashik news)

अंबड पोलिस ठाण्याच्या हद्दीमध्ये रविवारी (ता. २९) परिमंडळ उपायुक्त कार्यालयाचा कर्मचारी व नाशिक रोड पोलिस ठाण्यात वाहनचालक म्हणून नेमणुकीला असलेल्या कर्मचारी या दोघांनी तीन किरकोळ गुटखा विक्रेत्यांना ताब्यात घेतले होते.

इनोव्हातून आलेल्या या कर्मचाऱ्यांनी तिघांना वाहनातून नाशिक रोडला नेले. चौकशीतून ते ज्याच्याकडून गुटखा खरेदी करतात त्यास ताब्यात घेतले. तिघांकडून ‘चिरीमिरी’ घेऊन सोडून दिले आणि चौथ्यावर गुन्हा दाखल केला.

कदाचित चौथ्यालाही सोडले असते परंतु तोपर्यंत अंबड पोलिस ठाण्याच्या हद्दीतील कारवाईची वाच्यता पोलिस वर्तुळात पसरली. त्यामुळे चौथ्याविरुद्ध सुमारे १८ हजारांच्या गुटख्या प्रकरणी ‘विशाल’ कारवाई करून जप्त केल्याचा गुन्हा दाखल करण्यात आला.

हेही वाचा : 'पठाण'..आणि २०२३ मधले बाॅलीवूड..कसे असतील दिवस

या गुन्ह्यात फिर्यादीही नाशिक रोडचा पोलिस कर्मचारी असून, गुन्हा मात्र अंबड पोलिस ठाण्यात दाखल करण्यात आला होता. सदर सारा प्रकारच अत्यंत संशयास्पद असल्याची चर्चाच पोलिस वर्तुळात होती.

यासंदर्भात सविस्तर वृत्त ‘सकाळ’मध्ये ‘कुंपणच शेत खाते तेव्हा...’ या मथळ्याखाली प्रसिद्ध झाले होते. या वृत्ताची गंभीर दखल पोलिस आयुक्तांनी घेतली असून, त्यासंदर्भात परिमंडळ दोनचे उपायुक्त चंद्रकांत खांडवी यांना चौकशीचे आदेश दिले आहेत. त्यानुसार, उपायुक्तांनी त्या कारवाईशी संबंधित असलेल्यांकडून खुलासे मागविले आहेत.