Nashik News : 50 वर्षीय पुरुषाचा मृतदेह आढळला

Nashik News : सिन्नर तालुक्यातील पांगरी शिवारात जाम नदीपात्रालगत खडकाच्या आडोशाला एका अनोळखी पन्नास वर्षीय पुरुषाचा मृतदेह आढळून आला आहे.

पांगरी बुद्रुक चे तंटामुक्ती समितीचे अध्यक्ष चंद्रभान दळवी यांनी वावी पोलिस ठाण्यात याबाबत माहिती दिली. सदर व्यक्ती वाटसरू असल्याचे सांगण्यात येते. (dead body of 50 year old man was found in sinnar nashik news)

बेशुद्ध अवस्थेत असलेल्या या व्यक्तीला पोलिसांनी रुग्णालयात तपासणीसाठी नेले असता त्याचा रुग्णालयात आणण्यापूर्वीच मृत्यू झाल्याचे डॉक्टरांनी सांगितले.

उपाशीपोटी असल्याने त्याचा मृत्यू झाल्याचा अंदाज आहे. अर्ध नग्न अवस्थेत असलेल्या मृताच्या जवळ सफेद रंगाचा जांभळ्या रेषा असलेला मळकटलेला शर्ट, चॉकलेटी रंगाची फुल पॅन्ट, एक काळ्या रंगाचा चामडी कंबरेचा पट्टा अशा वस्तु आढळून आल्या.

बांधा सडपातळ, उंची 4.5 ते 4.75 फुट, डोक्याचे व दाढीचे केस काळे पांढरे वाढलेले, अगांत चॉकलेटी रंगाची अंडर वेअर, महेंदी रंगाची हाफ पॅन्ट असे वर्णन असलेल्या सदर व्यक्तीबाबत माहिती असल्यास वावी पोलिस ठाणे अथवा जवळच्या पोलिस ठाण्यात संपर्क साधावा असे आवाहन सहाय्यक पोलिसनिरीक्षक संदेश पवार यांनी केले आहे.