Nashik Crime News : देवळाली कॅम्पला अडीच लाखांची घरफोडी

नाशिक : दिंडोरी रोडवरील व्यापाऱ्याच्या घराचे लॉक तोडून चोरट्यांनी तब्बल ५ लाख ९१ हजारांचा ऐवज चोरून नेला. देवळाली कॅम्प परिसरातील धोंडी रोडवरील बंद घराचे लॉक तोडून चोरट्यांनी २ लाख ३६ हजारांचे ऐवज चोरून नेत घरफोडी केली. दिवाळीच्या सुटीत चोरट्यांची दिवाळी साजरी झाली आहे. (Deolali camp burglary stolen two half lakhs Nashik Latest Crime News)

रोहिंग्टन फरदीन देवळालीवाला (रा. धोंडी रोड, देवळाली कॅम्प) यांच्या फिर्यादीनुसार, बुधवारी (ता. २६) दीपावली पाडव्याच्या दिवशीच त्यांच्या बंद घराचे लॉक अज्ञात चोरट्यांनी तोडले. घरात प्रवेश करून चोरट्यांनी सोन्याच्या बांगड्या, अंगठ्या, सोन्याची चैन-पेडल, सोन्याचा नेकलेस, बांगड्या, एअर रिंग, अंगठी असा सुमारे २ लाख २६ हजार रुपयांचा ऐवज चोरून नेत घरफोडी केली. याप्रकरणी देवळाली कॅम्प पोलिसात घरफोडीचा गुन्हा दाखल झाला असून, उपनिरीक्षक एस. एस. पाडवी तपास करीत आहेत.

दरम्यान, दीपावली पाडव्याच्याच दिवशी दिंडोरी रोडवरील मालती मनोहर अपार्टमेंटमध्ये राहणारे व्यापारी सौरव जवाहर जैन हे कुटुंबीयांसह सायंकाळी बाहेर जेवणासाठी गेले असता, हीच संधी साधून चोरट्यांनी त्यांच्या बंद घराचे लॉक तोडून ५ लाख ९१ हजार रुपयांचा ऐवज चोरून नेला. चोरट्यांनी अवघ्या तासा- दीड तासात घरफोडी केली. सुरक्षेविषयी निष्काळजीपणा केल्याने त्यातून घरफोडीची घटना घडल्या. यामुळे मात्र चोरट्यांची दिवाळी झाली.