Nashik : अंड्याच्या आकाराचा किडनी स्टोन काढण्यात डॉक्टरांना यश

सटाणा (जि. नशिक) : गेल्या काही दिवसांपासून लघवीच्या त्रासाने त्रस्त असलेल्या एका सत्तर वर्षीय वृद्धावर येथील ॲपेक्स रुग्णालयात (Apex Hospital) मुतखड्याची (Kidney Stone) यशस्वी शस्त्रक्रिया (Surgery) करण्यात आली. मुतखड्याचा त्रास झाल्यामुळे काल मंगळवारी (ता.१७) रोजी करण्यात आलेल्या शस्त्रक्रियेमुळे रुग्णाच्या मूत्राशयातून २०० ग्रॅम वजनाचा अंड्याच्या आकाराचा गोळा काढण्यात डॉक्टरांना यश आले. सध्या या वृद्ध रुग्णाची प्रकृती उत्तम असल्याचे रुग्णालयाने डॉक्टरांनी सांगितले आहे. (Doctors succeed in removing egg Sized kidney stone Nashik News)

डोंगरगाव (ता.देवळा) येथील तानाजी पानसरे (वय ७०) हे वृद्ध जेमतेम लघवी होण्याची तक्रार घेऊन येथील प्रख्यात सर्जन डॉ.किरण अहिरे यांच्या ॲपेक्स हॉस्पिटलमध्ये आले होते. यावेळी पानसरे यांची तपासणी केली असता सोनोग्राफी व एक्स-रे मध्ये डॉ.अहिरे यांना पानसरे यांच्या मूत्राशयात मोठा खडा आढळला तसेच प्रोटेस्ट ग्रंथीही वाढलेली आढळली. डॉक्टरांनी रुग्ण व नातेवाईकांना पानसरे यांच्यावर तातडीने शस्त्रक्रिया करणे गरजेचे असल्याचे सांगितल्यावर ते तयार झाले.

यानंतर शस्त्रक्रिया करून पानसरे यांच्या मूत्राशयातील २०० ग्रॅम वजनाचा अंड्याच्या आकाराचा दगड व ५० ग्रॅम वजनाची प्रोटेस्ट ग्रंथी काढण्यात डॉक्टरांना यश आले. या दगडाची लांबी-रुंदी सुमारे सहा सेंटीमीटर इतकी आहे. शस्त्रक्रियेनंतर पानसरे यांची तब्येत उत्तम आहे. या शस्त्रक्रियेसाठी डॉ.किरण अहिरे यांना भूलतज्ञ डॉ.विष्णू बहिरम, डॉ.प्रवीण खैरनार, डॉ.सीमा खैरनार, डॉ.योगेश विंचू, डॉ.प्रवीण अहिरे, हिरामण गवळे, निलेश खैरनार यांनी सहकार्य केले.

"ग्रामीण भागातील गोरगरीब गरजू रुग्णांच्या सेवेसाठी रुग्णालय सुरू केले असून ज्येष्ठ सर्जन डॉ.किरण अहिरे यांनी ही शस्त्रक्रिया यशस्वीरित्या पार पाडली. सटाणा शहरात अशा प्रकारची शस्त्रक्रिया यशस्वी केल्यामुळे समाधान वाटते."

- डॉ. प्रवीण खैरनार, संचालक, ॲपेक्स रुग्णालय