Nashik News : कलावंतांनी साधला ‘एकदम कडक’ संवाद; 2 डिसेंबरला चित्रपट होणार प्रदर्शित

नाशिक : मराठी चित्रपटसृष्टीत वेगवेगळ्या धाटणीचे चित्रपट बनविले जाऊ लागले आहेत. अशाच स्‍वरुपातील अनोखा चित्रपट ‘एकदम कडक’ २ डिसेंबरला प्रदर्शित होत आहे. यानिमित्त चित्रपटातील कलावंतांनी बुधवारी (ता. १६) पत्रकार परिषदेत संवाद साधला. या कलावंतांच्‍या चमूने ‘सकाळ’ सातपूर कार्यालयास भेट देताना सकाळ- तनिष्का भगिनींशी दिलखुलास संवाद साधला. (ekdum kadak marathi movie cast meet with tanishka at sakal satpur office nashik Latest Marathi News)

दिग्दर्शक गणेश शिंदे यांच्‍यासह चित्रपटातील कलावंत तानाजी गलगुंडे, चिन्‍मय संत, रुक्‍मिणी सुतार, भाग्‍यश्री मोटे आदी उपस्‍थित होते. सातपूर येथे झालेल्‍या कार्यक्रमाचे कार्यक्रमाचे संयोजन तनिष्का समन्वयक विजयकुमार इंगळे यांनी केले. याप्रसंगी डॉ. सोनाली पाटील, डॉ. उज्ज्वला निकम, छाया पाटील, रोहिणी भामरे, अर्चना पाटील, कविता मेणकर, सारिका विटोरे, सुमन हिरे आदी तनिष्का सदस्‍य उपस्‍थित होते.

चित्रपटाविषयी माहिती देताना श्री. शिंदे म्‍हणाले, चित्रपटाचे पोस्टर, ट्रेलर आणि नृत्यांगना मानसी नाईकच्या ‘मॅडम कडक हाय’ गाण्यावरील दिलखेचक अदांनी सोशल मीडियावर धुमाकूळ घातला आहे. या वेगळ्या धाटणीच्या चित्रपटात एकदम कडक नेमकं काय पाहायला मिळणार आहे, हे २ डिसेंबरला सिनेमागृहात पाहणे रंजक ठरेल. पटकथा आणि संवाद कल्पेश जगताप याचे असून चित्रपटाच्या संगीताची बाजू स्व. नरेंद्र भिडे, पंकज पडघन आणि उमेश गवळी यांनी सांभाळली आहे.

गायक अवधूत गुप्ते, उमेश गवळी, सायली पंकज, सौरभ साळुंके यांनी त्यांच्या स्वरात चित्रपटातील गाणी सुरबद्ध केली आहेत. चित्रपटातील गीत मंगेश कांगणे यांचे आहे. संपूर्ण चित्रपट छायाचित्रकार बाबा लाड यांनी त्यांच्या कॅमेऱ्यात कैद केला आहे. चित्रपटाच्या संकलनाची बाजू आनंद कामत, संदीप जंगम आणि ओम साई फिल्म स्टुडिओ यांनी सांभाळली आहे. दरम्‍यान या संवाद कार्यक्रमादरम्‍यान तानाजी गलगुंडे याने आपल्‍या 'सैराट' चित्रपटातील रंजक अनुभवांची माहिती देताना दिलखुलास गप्पा मारल्‍या.