Nashik Job Fair : 3 हजारांपेक्षा जास्‍त जागांसाठी महेश भवनमध्ये आज रोजगार मेळावा

Nashik Job Fair : जिल्हा कौशल्य विकास, रोजगार व उद्योजकता मार्गदर्शन केंद्र, मॉडेल करिअर सेंटर आणि समर्पण बहुद्देशीय संस्थेतर्फे गुरुवारी (ता. १५) सकाळी अंबड-सिडको लिंकरोडवरील महेश भवन येथे रोजगार मेळावा आयोजित केला आहे.

पंडित दीनदयाळ उपाध्याय रोजगार मेळाव्‍यात तीन हजारांपेक्षा जास्‍त रोजगाराच्या संधी उपलब्‍ध असतील. ()

मेळाव्यात दहावी, बारावी, तसेच कोणत्याही शाखेतील पदवी, पदव्युत्तर पदवी, आयटीआय, डिप्लोमा, पदविका, अभियांत्रिकी, औषधनिर्माणशास्‍त्र, एमबीए, एमएसडब्ल्यू, आयटी/कॉम्प्युटर इंजिनिअर आदी विविध शैक्षणिक पात्रताधारक उमेदवारांसाठी संधी उपलब्ध आहेत.

तसेच स्वयंरोजगारासाठी आर्थिक सहाय्य करणारी शासनाची विविध महामंडळांचे स्टॉल लावले जाणार असून, कर्ज योजनांची माहिती, मार्गदर्शन उपलब्‍ध असेल.

मेळाव्यात नाशिकच्‍या बॉश लिमिटेड, महिंद्र ॲन्ड महिंद्र (नाशिक व इगतपुरी), युवाशक्ती फाउंडेशन, डब्ल्यूएनएस ग्लोबल सर्व्हिसेस, इक्विटास स्मॉल फायनान्स बँक, पूर्वा केमटेक (पिंपळगाव बसवंत), हेक्सागॉन न्यूट्रिशन, डेल्टा फिनोकेम (वाडीवऱ्हे), डीजी डाटा सोल्यूशन्स, क्वेस कॉर्प लिमिटेड, मिराक्वई व्हेन्च्युअर्स, एम. डी. इंडस्ट्रीज, मेड प्लस फार्मसी, हरिओम उद्योग इंडिया, रेन्बो डेकोप्लास्ट अशा एकूण ३५ पेक्षा जास्त कंपन्या व नियोक्ते तीन हजारांपेक्षा जास्‍त जागांसाठी निवड करतील.

नोकरी इच्छुक उमेदवारांनी सेवायोजन नोंदणी केलेली नसल्यास www.mahaswayam.gov.in या संकेतस्थळाला भेट देत प्रक्रिया पूर्ण करण्याचे आवाहन केले आहे. उमेदवारांनी मेळाव्‍यास उपस्थित राहण्याचे आवाहन विभागाच्‍या सहाय्यक आयुक्‍त अनिसा तडवी यांनी केले आहे.