Nashik ZP News: दांडिया ऐच्छिक असतानाही जि. प. कर्मचाऱ्यांना सक्ती

नाशिक : आपल्या सण-उत्सवाची परंपरा जपावी व कामाच्या ताणतणावातून काही काळ मुक्तता मिळावी, या उद्देशाने जिल्हा परिषदेच्या मुख्य कार्यकारी अधिकारी आशिमा मित्तल यांनी अधिकारी व कर्मचाऱ्यांसाठी बुधवारी (ता. २५) दांडियाचे आयोजन केले होते. (Even though Dandiya optional ZP force employees Nashik News)

या दांडिया उत्सवात सहभाग घेणे ऐच्छिक असल्याचे श्रीमती मित्तल यांनी जाहीर केलेले असतानाही कर्मचाऱ्यांना दांडिया खेळण्यासाठी विभागातील काही वरिष्ठ कर्मचाऱ्यांकडून सक्ती झाल्याची चर्चा आहे.

वरिष्ठ कर्मचाऱ्यांनी सक्तीची वर्गणी वसूल केल्याने कर्मचारी वर्गात नाराजीचा सूर उमटला. दांडियात सहभागी होणे ऐेच्छिक ठेवत २०० रुपये वर्गणी ठेवली होती. त्यासाठी कोणालाही सक्ती करू नये, अशा स्पष्ट सूचना श्रीमती मित्तल यांनी यंत्रणेला दिल्या होत्या.

सुरवातीला यास कर्मचारी वर्गाकडून सकारात्मक प्रतिसाद मिळाला होता. नंतर मात्र अचानक या महोत्सवाची काही विभागातील वरिष्ठ कर्मचाऱ्यांकडून सक्ती करण्यात आल्याचे बोलले जात आहे.

विभागातील वरिष्ठ कर्मचाऱ्यांनी यासाठी कर्मचाऱ्यांवर सक्ती करीत त्यांच्याकडून अतिरिक्त वर्गणीही वसूल केल्याची चर्चा जिल्हा परिषदेच्या वर्तुळात सुरू होती.

मात्र, प्रशासनाने अशी सक्तीची वसुली झाली नसल्याचा दावा केला आहे. दरम्यान, दांडिया महोत्सवात सुमारे ३५० हून अधिकारी, कर्मचाऱ्यांनी सहभाग नोंदविला.