शेतकऱ्याने द्राक्ष बागेवर चालवली कुऱ्हाड | Nashik

लासलगाव (जि. नाशिक) : गेल्या तीन वर्षांपासून सततच्या अवकाळी पावसामुळे द्राक्ष उत्पादक शेतकऱ्यांचे मोठे नुकसान होत आहे. निफाड तालुक्यातील ब्राह्मणगाव विंचूर येथील शेतकरी रावसाहेब गवळी यांनी आपल्या एक एकर शेतीमध्ये द्राक्ष लागवड केली होती, मात्र गेल्या २४ तासात झालेल्या अवकाळी पावसामुळे द्राक्ष बागेचे मोठे नुकसान झाल्याने वैतागून त्यांनी संपूर्ण द्राक्षबागेवर कुऱ्हाड चालवली.

लाखोंच्या उत्पन्नावर पाणी

गेल्या काही वर्षांपासून नाशिक जिल्ह्यात निफाड तालुक्यामध्ये अवकाळी पावसामुळे द्राक्ष उत्पादक शेतकरी हतबल झाले आहे. मोठ्या प्रमाणामध्ये द्राक्षबागा वाचवण्यासाठी खर्च करून देखील या अवकाळी पावसाने हातातोंडाशी आलेला घास हिरावून घेतल्याने निराशेतून ब्राह्मणगाव नजीक येथील शेतकऱ्याने आपल्या एक एकर द्राक्षबागेवर कुऱ्हाड चालवली आहे. या द्राक्षाच्या हंगामामध्ये दीड लाखाहून अधिक असा खर्च करून देखील संपूर्ण बागेचे या अवकाळीने नुकसान केल्याने अपेक्षित असलेले चार ते पाच लाखांचे उत्पन्नावर पाणी फेरावे लागले आहे.

दर कमी त्यात पावसाने केले नुकसान

या अवकाळी पावसात बाग वाचविण्यासाठी औषध फवारणी दररोज करूनही हाती काही येईल याची खात्री उरलेली नाही. यामुळे त्रस्त झालेल्या निफाड तालुक्यातील ब्राम्हणगाव (विंचूर) येथील रावसाहेब वसंत गवळी या शेतकऱ्याने एक एकर सोनाका द्राक्षबागेवर कुऱ्हाडीचे घाव घालून बाग तोडून टाकले. या अवकाळी पावसाने लासलगाव परिसरातील द्राक्ष उत्पादक शेतकरी चांगलेच धास्तवले. दोन वर्षे कोरोनामुळे सर्व बाजारपेठा बंद राहिल्या. शेतीमालाला योग्य दर मिळत नव्हता. त्यात आता अवकाळी पावसाने द्राक्ष बागांचे आणि पिकांचे नुकसान होत असून फुलोऱ्यात आलेल्या द्राक्ष बागा धोक्यात सापडल्या आहे.