कोयता थांबला, हंगाम लांबला; अवकाळी पावसाने पिकांची दाणादाण

सिद्धटेक (जि. अहमदनगर) : कालपासून सुरू झालेल्या अवकाळी पावसाच्या संततधारेमुळे शेतकऱ्यांची तारांबळ उडाली. मोसम सापडलेला ऊसतोडणी हंगाम त्यामुळे सर्वाधिक प्रभावित झाला आहे. दिवाळीनंतर धारदारपणे सुरू झालेला कोयता अवकाळीमुळे थांबला. ऊसतोडणी कामगारांच्या कोप्यांवरील जनजीवन पूर्णपणे विस्कळित झाले आहे.

गाळप हंगामाला ब्रेक

भीमाकाठावरील आडसाली उसाची तोडणी पूर्णपणे थांबल्याने व शेते वाफसा स्थितीत येण्यास वेळ लागणार असल्याने, गळीत हंगामही लांबणीवर पडण्याची शक्यता आहे.
अनेक दिवसांपासूनच्या ढगाळ हवामानानंतर भीमा नदीपट्ट्यात काल सायंकाळपासून वादळी वाऱ्यासह संततधार पाऊस सुरू आहे. त्यामुळे दिवाळीनंतर जोमाने सुरू झालेल्या गाळप हंगामाला ब्रेक लागला आहे. शिवाय, शेतातील कामे ठप्प झाली आहेत. ऊसवाहतूक करणारी अनेक वाहने शेतातच अडकून पडली आहेत.

रोग व किडींचा प्रादुर्भाव रोखण्याचे मोठे आव्हान

वाहतुकीसाठी तोडलेला ऊस शेतात तसाच पडून आहे. अनेक ठिकाणी सऱ्यांमध्ये पाणी साचले आहे. त्याचप्रमाणे ढगाळ हवामानामुळे इतर भाजीपाला पिके, कांदा, तसेच फूलउत्पादकांसमोर रोग व किडींचा प्रादुर्भाव रोखण्याचे मोठे आव्हान ठाकले आहे. दरम्यान, रिमझिम पाऊस व दाट धुक्यामुळे कांदा व इतर नगदी पिकांवर बुरशी, करप्यासारख्या रोगांचा प्रादुर्भाव होण्याची भीती शेतकऱ्यांमध्ये आहे.

''अवकाळी पावसाचा परिणाम गाळप हंगामावर नक्कीच होणार आहे. सध्या आडसाली उसाची तोडणी सुरू असून, पावसामुळे ती पूर्णपणे थांबली आहे. पावसाच्या उघडिपीनंतर दोन ते तीन दिवसांत तोडणी पुन्हा सुरू होईल.'' - सुरेश तावरे, मुख्य कार्यकारी अधिकारी, अंबालिका शुगर