पित्याला आदर्श शिक्षक पुरस्कार; लेकीला शिष्यवृत्तीत गोल्ड मेडल

नांदगाव (जि. नाशिक) : तालुक्यातील चांदोरे येथील जिल्हा परिषद प्राथमिक शाळेत (ZP primary school) कार्यरत असलेले उपशिक्षक अविनाश गुलाबराव खैरनार यांची नुकतीच राज्यस्तरीय सेवा सन्मान आदर्श शिक्षक पुरस्कार : २०२२ (State Level Service Honors Ideal Teacher Award) साठी निवड करण्यात आली. त्यानंतर कन्या वेदिकालाही राज्यस्तरीय शिष्यवृत्ती परीक्षेत (State Level Scholarship Examination) गोल्ड मेडल (Gold Medal) मिळाल्याने सर्वत्र कौतूक होत आहे.

अविनाश खैरनार यांची निवड सामाजिक, सांस्कृतिक, शैक्षणिक क्षेत्रात केलेले कार्य तथा ऑनलाइन पीडीएफ (Online PDF) निर्मिती यात विशेष कार्य केल्याबद्दल करण्यात आली आहे. हा सन्मान कुणाच्याही शिफारशीशिवाय, कुठलीही फी न आकारता महाराष्ट्र शिक्षक पॅनलच्या सर्व शिक्षकांकडून स्वतः खर्च करून देण्यात येतो. ही निवड नाशिक जिल्हा निवड समिती सदस्य गिरीष दारुंटे यांनी जाहीर केली. अविनाश खैरनार यांची मोठी कन्या वेदिका हिने ब्रेन डेव्हलपमेंट स्कॉलरशिप राज्यस्तरीय परीक्षेत ९७ टक्के गुण मिळवून गोल्ड मेडल संपादन करून घवघवीत यश मिळवले आहे. बाप- लेकीच्या या विशेष कामगिरीचे चांदोरे शाळेचे मुख्याध्यापक राजेंद्र पाटील यांच्यासह शिक्षक, स्थानिक शाळा व्यवस्थापन समिती व ग्रामस्थांनी अभिनंदन केले आहे.