पौरोहित्‍यातही महिलाराज | आवड जोपासताना सत्त्वाची ओळख

नाशिक : जीवनात सकारात्‍मक ऊर्जा असणे गरजेचे आहे. आवड जोपासताना तसेच स्वतः अंतर्मुख होऊन आपल्‍यातील सत्त्वाची ओळख पटली. हे सारे शक्‍य झाले केवळ मंत्रोच्चारातून, असे वासंती कुलकर्णी यांनी आपल्या पौरोहित्‍याच्या प्रवासाचे वर्णन ‘सकाळ’शी संवाद साधताना केले. (Latest Marathi News)

वासंती कुलकर्णी यांचे माहेर नागपूरचे, वडील शरीरशास्‍त्रातील एम. एस. आणि संस्‍कृत या विषयाचे अगाध ज्ञान यामुळे त्‍यांना लहानपणापासूनच संस्‍कृत विषयात गोडी निर्माण झाली. वडिलांकडून त्यांनी प्राथमिक मंत्रपठण शिकून घेतले. सासर नाशिकचे, त्‍यांना लहानपणापासूनच नाशिकबद्द‌ल कुतूहल होते. लग्‍नानंतर पतीच्या नोकरीनिमित्त नाशिक रोड येथे त्‍या स्थायिक झाल्‍या. संस्‍कृत चांगले असल्‍याने आणि वडिलांची लहानपणापासूनची शिकवण यामुळे त्या गीतेत पारंगत होत्‍या. तसेच त्‍यांच्या घराच्याजवळच विनया जोशी आणि श्रीमती परांजपे पौरोहित्याचे वर्ग घेतात. हे कळल्‍यावर त्‍यांनी २००६ मध्ये वर्गात प्रवेश घेतला. पाच वर्षांचे शिक्षण पूर्ण करत पुढे वेदोक्‍त शिक्षणासाठी त्‍यांनी श्रीमती दुगल यांच्याकडे शिक्षण घेतले. तसेच त्‍यांनी बी.ए.च्या शिक्षणात संस्‍कृत आणि संगीत या विषयात चांगले गुण प्राप्त केले.

संगीतामुळे मंत्रोच्चार, लय, सूर, तालबद्धता या गोष्‍टी सोप्या झाल्‍या. त्‍यामुळे अधिक गोडी निर्माण होत गेली, तसेच श्रीमती दुगल व साने गुरुजी यांचा या सगळ्यात सिंहाचा वाटा आहे, असे त्‍या म्‍हणाल्‍या. लहान मुलाचे संस्‍कारवर्ग तसेच महिलांसाठी गीतेचे वर्ग त्‍या घेतात. पौरोहित्‍य करतानाचे अनुभव सांगताना त्‍या म्‍हणाल्या, की पीडेने व्यापलेल्या एक गृहस्थांसाठी सौरसूक्ताचे नित्‍यपठण करत असताना त्‍यांच्या तब्‍येतीत सुधारणा झाली. यातून मिळणारा आनंद हा वेगळाच असतो. मिळणाऱ्या मानसिक समाधानामुळे मन प्रसन्न होते.