Nashik Crime News : BJP संपर्क कार्यालयाजवळ फोडले फटाके; 6 समाजकंटकांना अटक

नाशिक : अंबड परिसरातील चुंचाळे शिवारात भाजपच्या संपर्क कार्यालयाबाहेर काही समाजकंटकांनी हुल्लडबाजी करीत फटाके फोडल्याची घटना घडली. याप्रकरणी अंबड पोलिसांनी एका राजकीय पदाधिकाऱ्यासह सहा जणांना अटक केली असून, गुन्हा दाखल करण्यात आला आहे. (firecracker burst near BJP Liaison Office 6 sociopaths arrested Nashik Latest Crime News)

यशवंत शंकरराव पवार (रा. जाधव संकुल, चुंचाळे शिवार, अंबड) यांच्या फिर्यादीनुसार, गेल्या रविवारी (ता.२३) रात्री साडेअकरा वाजेच्या सुमारास एका राजकीय पक्षाचा पदाधिकारी व संशयित बाळा नागरे व त्याच्यासमवेत असलेल्या पाच-सहा जणांनी पवार यांच्या घराच्या भिंतीलगत आरडाओरडा करीत फटाके फोडले. तसेच काहींनी त्यांच्या घरावर व दुकानावरही फटाके फेकले. त्यानंतर आरडाओरडा करून संशयित पळून गेले. त्यानंतर याच संशयितांनी संदीप नरहरी तांबे यांच्या भाजप संपर्क कार्यालयाबाहेर शटरजवळ पुन्हा फटाके फोडले.

यावेळी संशयितांनी शिवीगाळ करीत पोबारा केला. घटनेची माहिती मिळताच अंबड पोलिस ठाण्याचे वरिष्ठ पोलीस निरीक्षक भगीरथ देशमुख यांच्यासह पोलीस पथकाने घटनास्थळी धाव घेतली. याप्रकरणी अंबड पोलिसात संशयितांविरोधात गुन्हा दाखल करण्यात आला. संशयितांची माहिती मिळताच पोलिसांनी संशयितांना अटक केली. सदरील गुन्ह्याचा तपास उपनिरीक्षक उत्तम सोनवणे हे करीत आहेत.