Ganeshotsav 2023: पर्यावरणपूरक शाडूच्या मूर्तींना प्राधान्य! ग्राहकांकडून बुकिंगला सुरवात

Ganeshotsav 2023 : प्लॅस्टर ऑफ पॅरिस मूर्तीला प्राधान्य न देता पर्यावरणपूरक शाडूच्या मूर्तींना ग्राहकांकडून प्राधान्य दिले जात आहे.

शाडूच्या मूर्ती बनविण्यासाठी बुकिंगनुसार मूर्तिकारांनी काम सुरू केले आहे. (Ganeshotsav 2023 Eco friendly Shadu idols preferred Start of booking from customers Nashik)

शाडूच्या मूर्ती बनविण्यासाठी साधारण आठ दिवसांचा कालावधी लागतो. गणेशोत्सव महिनाभरावर येऊन ठेपला आहे. त्या अनुषंगाने मूर्तिकार शाडूच्या गणेशमूर्ती बनविण्यासाठी सज्ज झाले आहेत.

शाडूच्या किमती १८० ते तीनशे रुपयांपर्यंत असून, ५० रुपयांची वाढ झाली आहे. मूर्तीवर सोनेरी व स्कीन कलर सर्वाधिक वापरला जातो. रंगांच्या किमतीतही दुप्पट वाढ झाली आहे.

नऊ इंचांपासून ते अडीच फुटांपर्यंत गणेशमूर्ती बनविल्या जात असून, अडीच ते दहा हजारांपर्यंत मूर्तीच्या किमती आहेत.

घरगुती विसर्जन करणाऱ्यांकडून शाडूच्या मूर्तीला प्राधान्य दिले जात असले तरी पीओपीच्या मूर्ती न वापरता शाडू मूर्तींना नागरिकांनी प्राधान्य द्यावे, त्यासाठी जनजागृती करण्यात यावी, असे मूर्तिकार सांगतात.

हेही वाचा : Credit Card फसवणूक....काय घ्याल काळजी?

लालबाग, दगडूशेठ मूर्तीची बुकिंग

शाडूच्या मूर्ती बनविण्यासाठी मूर्तिकार बुकिंगनुसार ग्राहकांच्या पसंतीने मूर्ती बनवून देत आहेत. लालबाग, दगडूशेठ, भारतीय बैठक, बालगणेश आदी मूर्तींची बुकिंग मोठी आहे. विविध गणपतीच्या फोटोनुसारही मूर्तिकार ग्राहकांना मूर्ती बनवून देत आहेत.

मूर्ती पूर्ण करण्यासाठी आठ दिवस

शाडूच्या गणेशमूर्ती बनविल्यानंतर त्या सुकण्यासाठी आठ दिवसांचा कालावधी लागतो. हिटर लावल्यास हा कालावधी चार दिवसांवर येतो. त्यानंतर पाचव्या दिवशी रंगकाम करून पुन्हा रंग सुकविण्यासाठी चार दिवसांचा अवधी लागतो. त्यामुळे एक मूर्ती बनविण्यासाठी साधारण आठ दिवस लागत असल्याचे मूर्तिकार सांगतात.

"बुकिंगनुसार शाडूच्या नऊ इंचापासून ते अडीच फुटांपर्यंत मूर्ती बनविण्याचे काम सुरू आहे. मूर्ती बनविण्यासाठी आठ दिवसांचा कालावधी लागत असून, शाडूच्या मूर्तींना उत्स्फूर्त प्रतिसाद आहे." -किरण भोईर, मूर्तिकार

"शाडूच्या लालबाग, दगडूशेठ, भारतीय बैठक, बालगणेश मूर्तींना ग्राहकांकडून प्रतिसाद आहे. फोटानुसारही मूर्ती तयार करण्याचे काम सुरू असून, यंदा माती, रंगांच्या किमतीत दुप्पट वाढ झाली आहे." -पुष्कराज भोईर, मूर्तिकार