भावाला नोकरी लावण्याच्या बहाण्याने महिलेचा विनयभंग | Nashik

नाशिक : भावाला नोकरी लावून देण्याच्या बहाण्याने महिलेचा विनयभंग केल्याप्रकरणी एकावर गुन्हा दाखल झाला आहे. तसेच, यात फसवणूक होत असल्याचे माहिती असूनही इतर सहा जणांनी कट रचून महिलेची फसवणूक करीत तिचा विनयभंग करणाऱ्याला मदत केल्याप्रकरणी सात जणांवर गुन्हा दाखल झाला आहे.

तक्रार मागे घेण्यासाठी तिला दमदाटी

नितीन सखाराम पाटील (५४), अलका नितीन पाटील (४९, ता. तळोदा, जि. नंदुरबार), सतीष भगवान पाटील (५७,) सुवर्णा सतीश पाटील (५१, प्रकाशा शहादा), छोटुलाल दामू पाटील (५०, परिवर्धा, ता. शहादा), वसंत पाटील वेलदा (ता. निजर, जि. तापी), वंदना रामदास तोरवणे (तळोदा, जि. नंदुरबार), अशी संशयितांची नावे आहेत. महिलेच्या तक्रारीनुसार संशयितांनी सहा महिने कट रचून फसवणूक करीत त्र्यंबकेश्वर, नाशिक रोड, इंदिरानगर आणि मुंबई नाका या भागात विश्वासघात करीत फसवणूक व विनयभंग केला.

नितीन पाटील याने महिलेच्या अगतिकतेचा गैरफायदा घेत तिच्या भावाला चांगली नोकरी लावून देण्यासह तिच्याशी विवाह करण्याच्या बहाण्याने तिचा विनयभंग केला. पोलिस आयुक्तांकडे दिलेला तक्रार अर्ज मागे घेण्यासाठी तिला दमदाटी केली, असे तक्रारीत म्हटले आहे. याप्रकरणी इंदिरानगर पोलिस ठाण्यात गुन्हा दाखल झाला आहे.