अवैध मद्याची वाहतूक; वाहनासह एकाला अटक

नाशिक : मुंबई- आग्रा महामार्गावरील ओझर येथील दहावा मैल परिसरात राज्य उत्पादन शुल्क विभागाच्या भरारी पथकाने अवैधरीत्या वाहतूक केले जाणारे दारू साठा व सहा चाकी वाहन, असा ५३ लाख ८८ हजारांचा मुद्देमाल जप्त केला. (illegal liquor stocks and 6 wheelers 53 lakh 88 thousand seized at Ojhar on Mumbai-Agra highway in nashik)

राज्य उत्पादन शुल्क विभागाचे भरारी पथक हे सोमवारी (ता. २७) मुंबई-आग्रा महामार्गावर गस्त घालत होते. या वेळी पथकाला अवैध मद्य वाहतूक होत असल्याची खबर मिळाली होती. त्यानुसार, पथकाने ओझर येथील दहावा मैल येथील कारभारी हॉटेलसमोर सहा चाकी वाहनाची (एमएच- ४३- वाय- ९२५१) तपासणी केली.

या वेळी वाहनात गोवा राज्यात तयार केलेली मात्र महाराष्ट्रात विक्रीस बंदी असलेला दारू साठा आढळून आला. वाहन चालक बबलू हरभजन यादव (३९, रा. उत्तर प्रदेश) यास पथकाने अटक केली. तसेच, पाच हजार ४०० लिटर दारू साठा व वाहन असा एकूण ५३ लाख ८८ हजार रुपयांचा मुद्देमाल जप्त केला. राज्य उत्पादन शुल्क विभागाचे अधीक्षक शशिकांत गर्जे यांच्या मार्गदर्शनाखाली भरारी पथकाचे निरीक्षक ए. एस. चव्हाण, दुय्यम निरीक्षक अ. गो. सराफ, व्ही. एम. पाटील, जवान गोकुळ शिंदे, विठ्ठल हाके, भाऊसाहेब घुले आदींच्या पथकाने ही कारवाई केली.