खड्ड्यांमधून मार्ग काढण्याच्या कसरतीत; मान-पाठ-कंबरेच्या समस्यांत वाढ

नाशिक : या वर्षी झालेला जोरदार पाऊस आणि रस्त्यांची झालेली चाळण यामुळे नागरिकांना खड्ड्यांमधून प्रवास करणे अधिक आव्हानात्मक झाले आहे. मागील दोन वर्षे कोरोनाच्या महामारीमध्ये बहुतांश जणांचे ‘वर्क फ्रॉम होम’ असल्याने खड्ड्यांमधून प्रवास करण्याची गरज तुलनेने कमी होती. परंतु यंदा सर्व दैनंदिन कामे सुरू असल्याने खड्ड्यांमधून प्रवास करणे अनिवार्य झाले आहे.

रोजच्या प्रवासामध्ये खड्ड्यांमुळे उद्‍भवणाऱ्या पाठ, कंबर आणि मानेच्या विविध आजारांचे प्रमाण वाढले आहे. हे आजार उद्‍भवू नयेत यासाठी थोडी काळजी घेणेही पुरेसे असल्याचे मत आरोग्य क्षेत्रातील तज्ज्ञांनी व्यक्त केले आहे. (Increase in neck back waist problems due to Potholes nashik Latest Marathi News)

मागील महिनाभरात खड्ड्यांमधून वाचण्यासाठीचे प्रयत्न करताना बाईकवरून पडल्याने अनेक अपघात झाले आहेत. शहरात अपघातामध्ये एका जणाचा मृत्यू झाल्याची घटना ताजी आहे. वारंवार होणाऱ्या घटनांमुळे खड्ड्यांमधून होणारा हा जीवघेणा प्रवास सुखकर कसा करता येईल, याबाबत चिंता व्यक्त केली जात आहे.

खड्ड्यांमधून प्रवास करताना विशेषत: पाठीचे आणि कंबरेचे आजार असलेल्या व्यक्तींनी अधिक काळजी घेणे गरजेचे आहे. प्रवास करताना सीटबेल्टचा वापर करणे फायदेशीर ठरेल. एक खड्डा चुकविण्याच्या नादात दुसऱ्या खड्ड्यात गाडी जाते आणि जोरदाक झटका बसल्याने पाठ, मान आणि कंबरेवर त्याचा विपरित परिणाम होतो.

त्यामुळे ‘स्लीप डिस्क’चा त्रास उद्‍भवू शकतो. वास्तविकता खड्ड्यांमुळे प्रवास करणे तर टाळता येऊ शकत नाही; पण खबरदारी मात्र घेऊ शकतो. त्याशिवाय जर तुम्ही पाठीचा रोज व्यायाम करत असाल तर तुमचे स्नायू बळकट होतात. त्यामुळे या खड्ड्यांच्या झटक्यांमुळे होणाऱ्या वेदना काहीशा कमी होऊ शकतात.

वोक्हार्ट हॉस्पिटलचे सांधेविकार शल्यचिकित्सक डॉ. पंकज गुंजाळ सांगतात, की जेवढ्या वेगात एखादा चालक खड्ड्यातून जातो तेवढ्या जोरात हिसका बसतो. दुचाकीस्वारांमध्ये मानेच्या व कमरेच्या समस्या तीन ते चारपटीने अधिक प्रमाणात दिसून येतात.

अशा समस्यांवर सुरवातीला व्यायाम आणि फिजिओथेरपी असेच उपचार केले जातात. तरीदेखील बरे न वाटल्यास एमआरआय किंवा एक्सरे काढून पुढील उपचार ठरविले जातात. तसेच इंजेक्शन देऊनही ही समस्या तात्पुरती बरी करता येऊ शकते.

दुचाकीस्वरांनी हे लक्षात ठेवा

खड्ड्यांमुळे झालेल्या अपघातामध्ये दुचाकीस्वारांच्या अपघाताचे प्रमाण जास्त आहे. त्यामुळे दुचाकीस्वारांनी तर खूपच काळजी घेण्याची गरज आहे. दुचाकीस्वारांनी हेल्मेट वापरावे. दुचाकीचा बॅक बाईक रेस्ट असल्यास उत्तम राहील आणि सर्वांत महत्त्वाचे म्हणजे दुचाकीचा वेग नियंत्रणात असावा.

ज्यांना रोज प्रवास करावा लागत असेल त्यांनी दररोज १५-२० मिनिटे मान आणि पाठीचे व्यायाम करणे आवश्यक आहे. धूम्रपान करणाऱ्यांना पाठ, मान आणि कंबरदुखीसारख्या समस्यांचा अधिक त्रास होतो. कारण त्यांची हाडे अधिक कमकुवत झालेली असतात. त्यामुळे धूम्रपानसारख्या वाईट सवयींपासून दूर राहणे योग्य राहील. हाडे मजबुतीसाठी संतुलित आहार घेणेही गरजेचे आहे.