Nashik : विधी, शिक्षणशास्‍त्र सीईटी नोंदणीची 22 पर्यंत मुदत

नाशिक : व्‍यावसायिक अभ्यासक्रमांच्‍या (vocational courses) प्रवेशासाठी सीईटी परीक्षा (CET Exam) घेतली जाणार आहे. ऑगस्‍टमध्ये होणाऱ्या सीईटी परीक्षांना समोरे जाण्याची अधिकाधिक विद्यार्थ्यांना संधी मिळावी, यासाठी सीईटी सेलने नोंदणीसाठी मुदत वाढविली आहे. या अंतर्गत विधी (Law) व शिक्षणशास्‍त्र (Pedagogy) अभ्यासक्रमांच्‍या सीईटीसाठी २२ जूनपर्यंत नोंदणी करता येणार आहे. तर एम.पीएड. अभ्यासक्रमासाठी ७ जुलैपर्यंत नोंदणीची संधी असेल. (Law Education CET registration deadline up to 22 june Nashik News)

विधी शाखेतील पदवीनंतर एलएलबी (३ वर्षे) आणि बारावीनंतर एलएलबी (५ वर्षे) या शिक्षणक्रमांच्‍या सीईटी नोंदणीसाठी २२ जूनपर्यंत मुदत वाढविली आहे, तसेच शिक्षणशास्‍त्र विद्या शाखेतील बी.एड.-एम.एड. हा इंटिग्रेटेड पदवी-पदव्‍युत्तर अभ्यासक्रम, एम.एड., बीए.बी.एड./बी.एस्सी.बीएड. हा संयुक्‍त पदवी अभ्यासक्रम, बी.पीएड. अभ्यासक्रमाच्‍या सीईटीसाठी २२ जूनपर्यंत नोंदणी करता येईल. तर एम.पीएड. या पदव्‍युत्तर पदवी अभ्यासक्रमाच्‍या नोंदणीची ७ जुलैपर्यंत मुदत असेल.

शैक्षणिक वर्ष २०२२-२३ च्‍या प्रवेशासाठी होत असलेल्‍या या प्रक्रियेंतर्गत शिक्षणशास्‍त्र व विधी शाखेतील अभ्यासक्रमांच्‍या सीईटी परीक्षा नोंदणीसाठी तिसऱ्यांदा मुदतवाढ दिली आहे. इयत्ता बारावीचा निकाल जाहीर झाल्‍यानंतर आता या नोंदणी प्रक्रियेला आणखी प्रतिसाद मिळण्याची शक्‍यता आहे.