बच्चू कडू माफी मागा, नाहीतर आत्मदहन; सुवर्णकार समाजाचा इशारा

सिडको (नाशिक) : ‘कोण लग्न रोखतो ते मी पाहतो. मी लग्नात येऊन नाचणार,’ असे वक्तव्य राज्यमंत्री बच्चू कडू यांनी केले होते. आंतरधर्मीय विवाह प्रकरणी बच्चू कडू यांनी केलेल्या वक्तव्यामुळे समाजातील एका पदाधिकाऱ्याचे हृदयविकाराच्या झटक्याने निधन झाले. तसेच सुवर्णकार समाजात तीव्र असंतोष निर्माण झाला असून, समाजबांधवांच्या भावना दुखावल्या आहेत. सुवर्णकार समाजाबद्दल केलेल्या वक्तव्याबद्दल ३० जुलैच्या आत कडू यांनी जाहीर माफी न मागितल्यास जिल्हाधिकारी कार्यालयासमोर आत्मदहन करण्याचा इशारा सुवर्णकार समाजाचे अध्यक्ष गजू घोडके यांनी दिला आहे. समाजाचे समाधान होईपर्यंत ही लढाई सुरूच राहील. महाराष्ट्रातील समाजबांधवांनी काळ्या फिती लावून कडू यांचा निषेध करावा, असे आवाहनही गजू घोडके यांनी केले आहे. (Minister-bacchu-Kadu-should-apologize-demands-suvarnakar-samaj-jpd93)

कडू यांच्यामुळेच ते लग्न करण्याचे कुटुंबाला बळ मिळाले - सुवर्णकार समाज

‘कोण लग्न रोखतो ते मी पाहतो. मी लग्नात येऊन नाचणार,’ असे वक्तव्य राज्यमंत्री बच्चू कडू यांनी केले होते. जणू काही संपूर्ण समाजाचे ते बाप आहेत, असाच आव त्यांनी आणला होता. समाजावर होणाऱ्या चांगल्या-वाईटाचा विचार न करता एकतर्फी निकाल देणे कितपत योग्य आहे, असा सवालही गजू घोडके यांनी केला आहे. मुलीच्या वडिलांना आम्ही समजावून सांगिल्यानंतर त्यांनी सुरवातीला लग्न व स्वागत सोहळा रद्द करण्याचे अभिवचन दिले होते. मात्र, कडू यांच्यामुळे त्यांना बळ मिळाले आणि समाजाचा विचार न करता त्यांनी २२ जुलैला लग्नाचा स्वागत सोहळा उरकून घेऊन आमचा विश्वासघात केला. आमचा लग्नाला विरोध नव्हताच. समाजातील कुणी मुलगा माझ्या मुलीशी लग्न करण्यास तयार नव्हता, अशा मुलीच्या वडिलांच्या दाव्यात काहीच तथ्य नाही. मुलगी गतिमंद होती तरी तिच्यासाठी समाजाची १०० मुले दाखविली असती, असा दावाही घोडके यांनी केला. कडू यांच्यानंतर शिक्षकभारतीचे आमदार कपिल पाटील मुलीच्या वडिलांची भेट घेऊन गेले. त्यांचेही समर्थन असल्याचेच यावरून निदर्शनास येते. कडू यांच्याप्रमाणेच आमदार पाटील यांनीही सुवर्णकार समाजाची माफी मागितली पाहिजे, अशी मागणीही घोडके यांनी केली. आम्ही व्यापारी माणसे आहोत. मात्र, समाजाविरुद्ध कुणी वक्तव्य करणार असतील, तर राज्यव्यापी बंद पुकारून आम्हाला आमची ताकद दाखवून द्यावी लागेल, असा इशाराही घोडके यांनी दिला.