'नकोशी'ला बेवारसपणे फेकणारी माता अखेर पोलीसांच्या ताब्यात

देवळा (जि.नाशिक) : वासोळ येथे दोन दिवसांपूर्वी नवजात स्त्रीजातीच्या अर्भकाला (new born baby) कपड्यांमध्ये गुंडाळून बेवारसपणे फेकणाऱ्या महिलेचा शोध लागला आहे. पोलिसांनी संशयित महिलेला बुधवारी (ता. १६) चौकशीसाठी ताब्यात घेतले.

रात्रभर थंडीत हंबरडा फोडणाऱ्या बाळासाठी आईच्या काळजाला पाझर नसेल का फुटला?

वासोळ येथील आदिवासी वस्तीतील मोडक्या झोपडीजवळ नवजात स्त्रीजातीचे जिवंत अर्भक बेवारसपणे फेकून दिल्याची घटना सोमवारी (ता. १४) सकाळी उघडकीस आली होती. भुकेने व्याकूळ झालेले हे लहान अर्भक रात्रभर थंडीत हंबरडा फोडत होते. बाळाची नाळही तशीच होती. बाळाच्या रडण्यामुळे तेथील नागरिकांचे लक्ष गेल्याने बाळाचे प्राण वाचले. कुत्र्यांनी डाव्या पायाच्या पंजाचे लचके तोडल्यामुळे गंभीर दुखापत झाली. या घटनेची माहिती पोलिसपाटील कैलास खैरनार व तंटामुक्ती अध्यक्ष चंद्रकांत पाटील यांना मिळताच त्यांनी घटनास्थळी धाव घेत त्या अर्भकाला वासोळ येथील आरोग्यवर्धिनी उपकेंद्रात उपचारासाठी आणले. तेथील डॉक्टरांनी प्राथमिक उपचार करून अधिक उपचारासाठी देवळा ग्रामीण रुग्णालयात दाखल केले होते. देवळा पोलिस मातेचा शोध घेत असतानाच बुधवारी तिचा शोध लागला. वासोळ येथीलच असलेल्या या अविवाहित महिलेच्या पोटी प्रेमसंबंधातून अर्भक जन्माला आले. मात्र मातृत्वाबाबत समाज आपल्याला विचारणा करेल, या विचाराने महिलेने बाळ आदिवासी वस्तीतील मोडक्या झोपडीजवळ फेकून फरारी झाल्याची बाब उघडकीस आली. पोलिसांनी या मातेला चौकशीसाठी ताब्यात घेतले असून, तिची डीएनएची चाचणी केली जाणार आहे.