मुलाचा खून करून मातेची आत्महत्या; आईवडील घरात असताना घडला प्रकार

इंदिरानगर (नाशिक) : पाथर्डी फाटा येथील हॉटेल एक्स्प्रेसइनजवळ राहणाऱ्या शिखा सागर पाठक (३२, रा. साई सिद्धी अपार्टमेंट) यांनी गळफास घेऊन आत्महत्या केल्याची घटना उघडकीस आली. त्याच खोलीत त्यांचा साडेतीन वर्षाचा मुलगा रिधान देखील मृतावस्थेत आढळून आल्याने खळबळ उडाली आहे. आत्महत्येचे नेमके कारण अद्याप पुढे आलेले नाही.

पोलिसांनी दिलेल्या माहितीनुसार शिखा चौथ्या मजल्यावर राहतात. बैठकीच्या खोलीत त्यांचे आई-वडील बसलेले होते. त्या दरम्यान त्या स्वतःच्या बेडरूममध्ये गेल्या आणि गळफास लावून घेत आत्महत्या केली. त्या ठिकाणी त्यांनी चिठ्ठी लिहून ठेवली असून त्यात आत्महत्येसाठी कोणालाही जबाबदार धरलेले नाही.

घटनेची माहिती मिळताच पोलिस उपयुक्त विजय खरात, सहाय्यक पोलिस आयुक्त सोहेल शेख आणि वरिष्ठ निरीक्षक नीलेश माईनकर यांनी तातडीने तेथे जात संपूर्ण घराची कसून तपासणी केली. त्याच खोलीत त्यांचा मुलगाही मृतावस्थेत आढळून आल्याने मुलाचा खून करून त्यांनी आत्महत्या केली असावी अशी शंका व्यक्त केली जात आहे. प्रथमदर्शनी त्यांनी आपल्या मुलाचा तोंडावर उशी दाबून खून केला असावा व मग स्वतः आत्महत्या केली असावी असे दिसून येत असल्याची शक्यता पोलिसांनी वर्तवली आहे. मृत्यूच्या वेळी त्यांचे आई-वडील घरातच उपस्थित होते. त्यांनी अद्याप काहीही तक्रार दिलेली नाही.