NMC News : सिंहस्थाच्या पार्श्वभूमीवर शासन अधिकाऱ्यांच्या ‘एन्ट्री’च्या हालचाली!

नाशिक : महापालिकेत अंतर्गत बदल्या करताना दावेदारांना डावलून कमी शिक्षण व अनुभव नसलेल्या कर्मचारी, अभियंत्यांना महत्वाची पदे देण्यावरून नाराजी असतानाच आता सिंहस्थ कुंभमेळाच्या कामाचेनिमित्त करून शासन सेवेतील दोन अधिकारी शहर अभियंता व अधिक्षक अभियंता पदावर बसविण्याच्या हालचाली सुरु असल्याने ट्रिपल इंजिन सरकारच्या कार्यकाळात विकास कामांपेक्षा प्रशासकीय कामकाजातील ढवळाढवळ अधिक चर्चेत आली आहे. (Nashik Simhastha kumbh mela officials transfer marathi news)

सन २०२७ मध्ये नाशिक नगरीत कुंभमेळा होत आहे. त्यासाठी महापालिकेकडून ११ कोटींहून अधिक किमतीचा आराखडा तयार केला आहे. सिंहस्थ कुंभमेळा पार पाडण्यासाठी नाशिक महानगरपालिका सक्षम यंत्रणा असताना कुंभमेळ्याचे निमित्त करून शासन सेवेतील दोन अधिकारी शहर अभियंता व अधीक्षक अभियंता या पदावर नियुक्त करण्याचा घाट घातला जात आहे.

सार्वजनिक बांधकाम विभागातील हे दोन अधिकारी असून या दोघांची महापालिकेत नियुक्ती झाल्यास वाद निर्माण होणार आहे. महापालिकेत आधीच शासन व परत सेवेतील अधिकाऱ्यांमध्ये सूप्त वाद आहे. (Latest Marathi News)

आता कुंभमेळ्याचेनिमित्त साधून शासन समिती अधिकारी स्थानिक स्वराज्य संस्थेमध्ये नियुक्त करण्याच्या हालचाली गतिमान झाल्याने नाराजीत अधिक भर पडली आहे नाशिक महापालिकेत सध्या या दोन्ही पदांवर स्थानिक अधिकाऱ्यांची नियुक्ती झाली आहे. यातील एक अधिकारी ३१ मे रोजी सेवानिवृत्त होत आहे.

स्थानिक अधिकाऱ्यांना महत्त्वाच्या पदांवर पदोन्नती देणे अपेक्षित असताना शासनसेवेतील अधिकारी आणले जात असल्याने मोठ्या प्रमाणात नाराजी निर्माण झाल्याचे बोलले जात आहे