Nashik News : बॉईज टाऊन प्रकरणी समिती गठित; पालकांकडून रोष व्‍यक्‍त, व्‍यवस्‍थापनाने फेटाळले आरोप

Nashik News : बॉईज टाऊन पब्‍लिक स्‍कूलमधील माध्यमिक स्‍तरावरील विद्यार्थ्यांना विनाअनुदानित तत्त्‍वानुसार शैक्षणिक शुल्‍क भरण्याचा दावा करताना पालकांनी शिक्षणाधिकाऱ्यांकडे दाद मागितली आहे. यानंतर जिल्‍हा परिषदेचे माध्यमिक शिक्षणाधिकारी प्रवीण पाटील यांनी तीन अधिकाऱ्यांचा समावेश असलेली समिती गठित केली असून, या समितीमार्फत सत्‍यता, अटी-शर्तींची पडताळणी होणार असल्‍याचे समजते. (Committee formed in Boys Town School case Outrage from parents)

बॉईज टाऊन पब्‍लिक स्‍कूलमधून इयत्ता चौथीमध्ये उत्तीर्ण झाल्‍यानंतर पाचवीच्‍या प्रवेशावेळी विद्यार्थ्यांना विनाअनुदानित तत्त्‍वासंदर्भातील माहिती देताना सुधारित शुल्‍क भरण्यास सांगण्यात आले. तेव्‍हापासून शालेय व्‍यवस्‍थापन विरुद्ध पालक अशी वादाची ठिणगी पडलेली आहे. दरम्‍यान नुकतीच नोटीस बजावताना येत्‍या १० जूनपर्यंत शुल्क भरण्याच्‍या सूचना देण्यात आल्‍या.

यासंदर्भात पूर्वीपासून विरोध करणाऱ्या पालकांनी आता शिक्षण उपसंचालक तसेच शिक्षण विभागातील इतर अधिकाऱ्यांकडे दाद मागितली आहे. पूर्णतः अनुदानित असतानाही विनाअनुदानित करण्याचा घाट का घातला जातो आहे, असा प्रश्‍न पालकांकडून उपस्‍थित होत आहे.

दरम्‍यान पालकांच्‍या आरोपांनंतर शिक्षणाधिकारी प्रवीण पाटील यांनी समिती गठित केली आहे. या समितीमध्ये उपशिक्षणाधिकारी उदय देवरे, गणेश फुलसुंदर, प्रकाश अहिरे यांचा समावेश आहे. सर्व बाबींची पडताळणी करून समिती शिक्षणाधिकाऱ्यांना अहवाल सादर करेल. (latest marathi news)

मोजक्‍याच पालकांची आडकाठी

संस्थेच्या पदाधिकाऱ्याशी संपर्क साधत भूमिका जाणून घेण्याचा प्रयत्न केला असता त्यांनी १५८ विद्यार्थ्यांनी शुल्‍क भरले असून, केवळ २२ जणांचे शुल्‍क भरलेले नाही. मोजक्‍याच पालकांकडून आडकाठी आणली जात आहे असे सांगत व्‍यवस्‍थापनाची भूमिका पालकांसमोर यापूर्वीच मांडल्याचे सांगितले.

तसेच बहुतांश पालक संस्थेच्या भूमिकेशी सहमत आहेत. परंतु हेतुपुरस्सर काही पालक अडवणूक करत असल्याचे म्हणत पदाधिकाऱ्याने कुठल्‍याही प्रकारे शासकीय नियमांचे उल्‍लंघन केलेले नसल्याचा दावा केला आहे.