Nashik Corona Update: शहरात नव्या व्हेरिएंटचा प्रसार! 18 बाधित; वैद्यकीय यंत्रणा अलर्टवर

नाशिक : मागील आठ दिवसांत शहरात कोरोनाच्या नव्या व्हेरिएंटने अठरा जणांना बाधित केले आहे.

त्यामुळे वैद्यकीय यंत्रणा अलर्ट मोडमध्ये आली असून, रुग्णांच्या संपर्कातील व्यक्तींचा शोध घेऊन अॅन्टिजेन तपासण्या केल्या जात आहेत. (Nashik Corona Update Spread of new variants in city 18 affected Medical system on alert)

नाशिक जिल्ह्यात सिन्नर, त्र्यंबकेश्वर मध्ये कोरोनाचे रुग्ण आढळल्याने खळबळ उडाली. कोरोनाच्या पार्श्‍वभूमीवर टास्क फोर्स स्थापन करण्यात आल्यानंतर दोनच दिवसांत कोरोनाच्या नव्या व्हेरिएंटचा प्रादुर्भाव वाढत असल्याचे स्पष्ट झाले.

यापूर्वी कोरोनाचे तीन रुग्ण होते. महात्मानगरमधील ३२ वर्षीय महिलेला सर्दी, खोकल्याचा त्रास जाणवू लागल्यानंतर शहरातील एका खासगी रुग्णालयात उपचारासाठी दाखल करण्यात आले होते. या महिलेची आरटीपीसीआर चाचणी पॉझिटिव्ह आढळून आली. उर्वरित रुग्णांवर घरीच उपचार सुरू होते.

कोरोनाची लक्षणे आढळलेल्यांपैकी एक हजार ५०६ जणांच्या अॅन्टिजेन, तर १०३ जणांच्या आरटीपीसीआर एकूण एक हजार ६०९ जणांच्या चाचण्या करण्यात आल्या. यात १८ कोरोना पॉझिटिव्ह आढळले.

रुग्णांना गृहविलगीकरणात ठेवण्यात आले. सर्व रुग्णांची प्रकृती स्थिर असल्याचे महापालिकेचे वैद्यकीय अधीक्षक डॉ. तानाजी चव्हाण यांनी सांगितले. एकीकडे कोरोनाने डोके वर काढले असताना डेंगीच्या साथीचा प्रादुर्भावही कायम असल्याचे दिसून येत आहे.

गेल्या आठवडाभरात ३१ संशयित रुग्णांचे रक्त नमुने तपासणीसाठी प्रयोगशाळेकडे पाठविण्यात आले होते. त्यापैकी ११ जणांना डेंगीची लागण झाल्याचे निष्पन्न झाले आहे.

यात नाशिक पूर्व, पंचवटी, नाशिक रोड विभागांतील प्रत्येकी दोन, सिडकोतील चार, तर सातपूर विभागातील एकाचा समावेश आहे.