Nashik : तिसऱ्या लाटेसाठी दोन लाख ॲन्टिजेन किट खरेदी

नाशिक : कोरोना तिसऱ्या लाटेचा सामना करण्यासाठी वैद्यकीय विभागाने सादर केलेल्या दोन लाख रॅपिड ॲन्टिजेन किट खरेदीला स्थायी समितीने शुक्रवारी (ता.१) मान्यता दिली. मागील वर्षी ५०४ रुपये दराने खरेदी केलेल्या वादग्रस्त विषयावर मात्र चर्चा झाली नाही.

मागील वर्षाच्या मार्च महिन्यात देशात कोरोनाची लाट सुरू झाल्यानंतर तातडीची बाब म्हणून रॅपिड ॲन्टिजेन टेस्ट किट खरेदी करण्यात आली. पहिल्या व दुसऱ्या लाटेत पाच लाख २, ७५० रॅपिड ॲन्टिजेन टेस्ट किट खरेदी करण्यात आल्या. नव्या किट खरेदीसाठी काढण्यात आलेल्या निविदेत दरामध्ये जवळपास दहापट तफावत आढळली. मागील वर्षी ५०४ रुपये किमतीला प्रत्येकी एक रॅपिड ॲन्टिजेन किट खरेदी करण्यात आले. महापालिकेने तिसऱ्या लाटेसाठी पुन्हा एकदा ॲन्टिजेन टेस्ट खरेदी करण्याचा निर्णय घेतला.

त्यासाठी निविदा प्रक्रिया राबविल्यानंतर ४५ रुपये किमतीला एक किट उपलब्ध झाल्याने किटच्या किमतीमधील तफावतीवरून संशय निर्माण झाला आहे. शुक्रवारी झालेल्या स्थायी समितीच्या सभेत जुन्या वादग्रस्त खरेदीवर चर्चा होणे अपेक्षित असताना त्यावर सदस्यांनी मौन बाळगले. तिसऱ्या लाटेचा सामना करण्यासाठी नव्याने दोन लाख किट खरेदीला मात्र मान्यता देण्यात आली.

महापौरांच्या प्रभागात बंदिस्त नाला

पदाचा कार्यकाळ संपुष्टात येत असताना महापौर सतीश कुलकर्णी यांच्या प्रभाग २३ मध्ये मोठ्या प्रमाणात कामांचा धडाका लावला आहे. रविशंकर मार्गावरून जाणाऱ्या नैसर्गिक नाल्या बंदिस्त केला जात असल्याने काँग्रेसचे नगरसेवक राहुल दिवे यांनी प्रस्तावाला विरोध केला. नैसर्गिक नाला बंदिस्त करता येत नाही. बंदिस्त करायचा असेल तर हा नाला प्रभाग क्रमांक १६ मधून पुढे वाहत असल्याने तोदेखील बंदिस्त करण्याची मागणी त्यांनी केली.