Nashik Burglary Crime : 2 घरफोड्यात साडेसहा लाखांवर डल्ला : पोलिसांना आव्हान

Nashik Burglary Crime : शहर आयुक्तालय हद्दीमध्ये घरफोड्यांच्या घटनांमध्ये सातत्याने वाढ होते आहे. मंगळवारी (ता. ३०) दोन घरफोडीच्या घटना भरदिवसा घडल्या असून चोरट्यांनी ६ लाख ३८ हजारांचे दागिने व रोकडवर डल्ला मारला आहे. यामुळे पोलिसांसमोर घरफोड्या करणाऱ्या चोरट्यांचे मोठे आव्हान उभे राहिले आहे. (Nashik Crime 2 house burglaries)

पंचवटीतील अमृतधाम येथे बंद फ्लॅटचे लॅचलॉक तोडून चोरट्यांनी १ लाख २३ हजारांचे दागिने व रोकड चोरून नेत घरफोडी केली. विजय भास्कर चौधरी (रा. सिद्धीविनायक ॲनॅक्स, वरद कॉलनी, अमृतधाम) यांच्या फिर्यादीनुसार, २९ तारखेला दुपारी दीड ते रात्री साडेअकरा या दरम्यान सदरची घरफोडी झाली.

याप्रकरणी पंचवटी पोलिसात गुन्हा दाखल करण्यात आला आहे. दुसरी घरफोडी आडगाव शिवारात झाली.

सुरेश देवराम धोंगडे (रा. महालक्ष्मीनगर, आडगाव शिवार) यांच्या फिर्यादीनुसार, ३० तारखेला सकाळी साडेदहा ते दुपारी दोन यावेळेत त्यांच्या बंद कल्पतरु बंगल्याच्या दाराचे कुलूप तोडून चोरट्यांनी ५ लाख १५ हजारांचे चांदीच्या कोईरी व रोकड असा मुद्देमाल चोरून नेला. याप्रकरणी आडगाव पोलीसात घरफोडीचा गुन्हा दाखल करण्यात आला आहे.