Dindori Lok Sabha Election 2024 Result : कांदान कया भाजपना वांदा; दिंडोरीमा कांदांन वाजी तुतारी!

Nashik News : लोकसभेच्या निवडणुकीत शेतकऱ्यांचे प्रश्‍नांकडे विशेषत: कांद्याकडे दुर्लक्ष केल्याने सरकारला त्याची किंमत मोजावी लागल्याचे ज्ञात होते. दुसऱ्यादा सत्तेवर येऊन मात्र मोदी सरकारने वारंवार शेतकरी हिताची निर्णय घेण्याऐवजी शेतकरी विरोधी धोरण अवलंबले. कांदा उत्पादक दिंडोरी मतदार संघात भारती पवार यांना कांद्याने खासदार केलं. (Dindori Lok Sabha Election 2024 Result)

भारती पवार मंत्री झाल्या. मात्र, कांद्याचे दर वाढले की निर्यात बंद केली जात होती. शेतकऱ्यांच्या विरोधात भूमिका घेतल्याने मतदारसंघात रोष वाढत गेला. शेतकऱ्यांचा आक्रोश आणि त्यांच्या मनातील भावना एकजुटीने मतदानात दिसून आल्या अन् दिंडोरी मतदारसंघात ‘कांदान भाजपना कया वांदा; दिंडोरीमा कांदांन वाजी तुतारी’ अशी चर्चा निकालातून सर्वत्र होऊ लागली.

दिंडोरी मतदारसंघात कांदा, द्राक्ष, धान्य, डाळी आदींचे सरकारचे अन्यायकारक आणि एकतर्फी शेतमाल निर्यात धोरण निवडणुकीत मुख्य मुद्दे राहिले. त्यामुळे आपसूकच भाजपविषयी नाराजीचे वातावरण तयार होत गेले. निवडणूक सुरु असताना गुजरातच्या कांद्याला निर्यात खुली, कांद्याची निर्यात शुल्कवाढ ही धोरणे कांदा उत्पादकांच्या जखमेवर मीठ चोळणारी ठरली. (latest marathi news)

नांदगाव, येवला, चांदवड या मतदारसंघातील फक्त पावसाळी कांदा हे एकमेव पिक असतांना उत्पादन हातात आल्यावर डिसेंबरपासून निर्यातबंदीच्या निर्णयामुळे या तालुक्यात अधिक रोष वाढला. तर चांदवड, निफाड या भागात कांदा व द्राक्ष या दोघाही पिकांना बसलेला फटका या भागातील मतदारांनी प्रचारकाळात भारती पवारांना केलेल्या विरोधातून तीव्र होत गेला.

कांद्यामुळेच भारती पवार मंत्री झाल्या अन् कांद्यानेच त्यांना पाडून शेतकऱ्यांनी जमिनीवर आणल्याच्या प्रतिक्रिया सोशल माध्यमातून पहायला मिळाल्या. कांदा, द्राक्ष, भाजीपाला कडधान्य, सोयाबीन, कापूस कशालाच भाव मिळाला नाही. याचा सर्व वचपा नाशिक व दिंडोरी मतदारसंघात मतदारांनी काढला.