Nashik News : मॉन्सून पश्चात पाणी स्रोतांचे स्वच्छता सर्वेक्षण करा : डॉ. सुधाकर मोरे

नाशिक : जनतेला शुद्ध व सुरक्षित पाणी पुरवठा होण्यासाठी पाण्याची गुणवत्ता चांगली असणे आवश्यक आहे. यासाठी स्वच्छता सर्वेक्षण महत्त्वाचे आहे. स्वच्छता सर्वेक्षणातून स्त्रोताभोवतीचा परिसर, पाणी पुरवठा संरचना व व्यवस्थापनातील जे काही दोष आढळून येतात. त्यांचे निराकरण वेळेत करता येऊन जलजन्य आजारांना/ साथींना प्रतिबंध करता येणे शक्य असल्याचे जिल्हा परिषदेचे जिल्हा आरोग्य अधिकारी डॉ. सुधाकर मोरे यांनी सांगितले. जिल्ह्यात स्वच्छता सर्वेक्षण हे आरोग्य विभागामार्फत केले जाते. ( Carry out sanitation survey of water sources after monsoon )

पावसाळयापूर्वी मार्च ते मे व पावसाळ्यानंतर ऑक्टोबर ते डिसेंबर या काळात पाण्याचे स्त्रोत व अन्य बाबींसाठी शासनाच्या मार्गदर्शक सूचनांनुसार स्वच्छता सर्वेक्षण केले जाते. याच पार्श्वभूमीवर, तालुकयातील जलसुरक्षक, ग्रामसेवक, आरोग्य सेवक, आरोग्य सहाय्यक(पु), विस्तार अधिकारी (पंचायत/आरोग्य) यांना कार्यप्रणालीचे एक दिवसाचे प्रशिक्षण जिल्हास्तरीय पथकामार्फत जिल्हा साथ वैद्यकीय अधिकारी डॉ. भारती चव्हाण, सुरेश जाधव यांनी तालुका स्तरावर जाऊन प्रशिक्षण घेत आहेत. या प्रशिक्षणात डॉ. मोरे बोलत होते. (latest marathi news)

सर्व प्राथमिक आरोग्य केंद्रात कार्यरत द्वितीय वैद्यकीय अधिकारी यांचेवर या सर्वेक्षणाची जबाबदारी देण्यात येत आहे. हे अत्यंत वैशिष्ट्यपूर्ण सर्वेक्षण असून सर्वेक्षणाद्वारे ग्रामपंचायतींना लाल, हिरवे, पिवळे, चंदेरी कार्ड जिल्ह्यात वितरित केले जाते. यापूर्वी नाशिक जिल्ह्यात झालेल्या साथरोग घटनांचा पूर्वानुभव अभ्यासला असता साथरोग मागील कारणमीमांसा बघितल्यास हे सर्वेक्षण गुणवत्तापूर्वक झाल्यास जिल्ह्यात पावसाळ्यात व पावसाळ्यानंतर उद्भवणाऱ्या साथींना आळा घालणे शक्य होईल, असे डॉ. मोरे यांनी सांगितले.

तालुकानिहाय होत असलेल्या प्रशिक्षणाची संनियंत्रण व प्रशासकीय जबाबदारी गटविकास अधिकारी व तांत्रिक जबाबदारी तालुका आरोग्य अधिकारी यांची राहील. जिल्ह्यात एकाच वेळी मॉन्सून पश्चात म्हणजेच पावसाळ्यानंतर १ ते ३१ ऑक्टोबर या कालावधीत स्वच्छता सर्वेक्षण मोहीम हाती घ्यावी असे अतिरिक्त जिल्हा आरोग्य अधिकारी डॉ. राजेंद्र बागूल यांनी सांगितले.