Nashik News : रेल्वेस्थानकावर फुकट्या प्रवाशांना दंड; तिकीट तपासणी जोमात

Nashik News : नाशिक रोड रेल्वेस्थानकावर सध्या उन्हाळी सुट्यांमुळे मोठ्या प्रमाणावर गर्दी पाहायला मिळत आहे. पर्यटक फिरण्यासाठी नाशिकला पसंती दर्शवत आहे. याच पार्श्वभूमीवर सध्या नाशिक रोड रेल्वेस्थानकावर तिकीट तपासणी मोहीम मोठ्या सक्तीने राबविली जात आहे. फुकट्या प्रवाशांवर तिकीट तपासणीस निरीक्षण करून त्यांना दंड करत आहेत. (Nashik Free passengers fined at railway station )

नाशिक रोड रेल्वेस्थानक हे उत्तर महाराष्ट्रातील नव्हे, तर भारतातील एक महत्त्वाचे रेल्वेस्थानक समजले जाते. येथे रोज ५२ गाड्या मार्गक्रमण करतात. त्याचप्रमाणे काही विशेष गाड्या हप्त्यातून मार्गक्रमण करतात. नाशिकला त्र्यंबकेश्वर, वणी, मांगीतुंगी, पंचवटी व इतर धार्मिक स्थळांना भेटी देण्यासाठी नागरिक येथे उतरतात. सध्या नाशिक रोड रेल्वेस्थानकावर मोठ्या प्रमाणावर प्रवाशांची गर्दी पाहायला मिळत आहे. याच पार्श्वभूमीवर फुकटे प्रवासी मोठ्या प्रमाणावर प्रवास करीत आहे. (Latest Marathi News)

रेल्वेस्थानकावर तिकीट तपासणीस नजर ठेवून आहे. फुकट्या प्रवाशांना कडक शासन केले जात आहे. विनातिकीट प्रवाशांवर कारवाई करून दंड वसूल केला जात आहे. विशेष करून प्लॅटफॉर्म क्रमांक एकवर आणि चारवर ही मोहीम मोठ्या दिमाखात सुरू आहे. यामुळे रोज किमान अंदाजे ३० ते ३५ हजार दंड वसूल केला जात आहे. रोज ४० ते ५० केसेस होत असल्याची माहिती तिकीट तपासणीस यांनी ‘सकाळ’ला दिली.