नाशिक : आकाशवाणी टॉवरजवळ भाजी विक्रेत्यांची दादागिरी

नाशिक : गंगापूर रोडवरील (Gangapur road) आकाशवाणी टॉवरजवळ (Akashwani tower) महापालिकेने (Nashik municipal corporation) कोट्यवधी रुपये खर्च करून भाजी मार्केट (vegetable market) उभारले, परंतु त्या जागेचा वापर भाजी विक्रेते वाहने पार्किंगसाठी (vehicle parking) करत आहेत. रस्त्यावर भाजी विक्री केली जात आहे. विशेष म्हणजे महापालिकेच्या अतिक्रमण विभागाकडूनही कारवाई होत नसून विक्रेत्यांशी लागेबांधे असल्याचा आरोप या भागातील नगरसेवक योगेश हिरे (yogesh hire) यांनी केला असून कारवाई न झाल्यास आंदोलनाचा इशारा (strike warning) दिला.

स्थायी समितीच्या सभेत आकाशवाणी टॉवर जवळील भाजी बाजाराच्या मुद्द्यावर जोरदार चर्चा झाली. नगरसेवक हिरे यांनी त्यांच्या प्रभाग क्रमांक सातमधील आकाशवाणी टॉवर जवळील अनधिकृत भाजी बाजाराचा मुद्दा छेडताना गंभीर आरोप केले. महापालिकेने भाजी मार्केट बांधूनही विक्रेते त्या जागेत न बसता रस्त्यावर बसत असल्याने वाहतूक ठप्प होते. ज्येष्ठ नागरिकांची वर्दळ, २२ क्लासेस या भागात आहे. त्यात भाजी विक्रेते रस्त्यावर बसत असल्याने वाहतूक ठप्प होते. शंभर मीटर अंतर पार करण्यासाठी वीस ते बावीस मिनिटे लागतात. एवढी भयंकर परिस्थिती निर्माण झाली आहे.

स्थानिक नगरसेवकांनी अतिक्रमण विभागाला २५ पत्रे देवूनही कारवाई करत नसल्याने अधिकाऱ्यांचे लागेबांधे असल्याचा आरोप नगरसेवक हिरे यांनी केला. भाजी विक्रेत्यांकडून रस्त्याच्या कडेला अस्वच्छता केली जाते. हाणामारीचे प्रकार वांरवार होतात. त्यामुळे तातडीने कारवाई करण्याची मागणी केली. सातपूर विभागात नगरसेविका माधुरी बोलकर यांनी अतिक्रमणाचा मुद्दा उपस्थित केला, तर प्रतिभा पवार यांनी अतिक्रमण विभागाची पाठ फिरताच पुन्हा जैसे- थे परिस्थिती होत असल्याचे निदर्शनास आणले.

राष्ट्रवादी आक्रमक, आंदोलनाचा इशारा

अनधिकृत भाजी बाजारावर राष्ट्रवादी काँग्रेसदेखील आक्रमक झाली असून, ओट्यांचे वाटप होवूनही विक्रेते रस्त्यावर बसत असल्याचे सांगताना या विरोधात अनेकदा निवेदने देवूनही कारवाई होत नसल्याचा आरोप राष्ट्रवादी काँग्रेसचे मध्य विधानसभा मतदारसंघाचे अध्यक्ष किशोर शिरसाट यांनी केला. अनधिकृत भाजी बाजारामुळे वाहतूक ठप्प होण्याबरोबरच गुंडगिरी सारख्या अनेक समस्या निर्माण होत असल्याने तातडीने कारवाई न झाल्यास आंदोलनाचा इशारा दिला.