Nashik News : नगरसूलचा अमोल राज्यात प्रथम; आयुष्य संचालनालय भरतीत मिळविले यश

Nashik News : शेतात राबविणाऱ्या आई वडिलांच्या कष्टाचं चीज करण्यासाठीच त्यांना शेती कामाला मदत करून अभ्यासाला परिश्रमाची जोड दिसल्यास यशाचे शिखर गाठता येत असल्याचे सिद्ध केलंय येवला तालुक्यातील नगरसुल येथील शेतकरी दिलीप आणि लता खैरनार यांच्या मुलगा अमोलने. अमोल याने वैद्यकीय शिक्षण संशोधन व आयुष्य संचालनालय, महाराष्ट्र राज्य,मुंबई यांच्या अंतर्गत घेण्यात आलेल्या वाहनचालक पदासाठी महाराष्ट्र राज्यात प्रथम क्रमांक मिळवून आई-वडिलांचे स्वप्न साकार केले आहे. (Nashik Nagarsul success in first life directorate recruitment in Amul state marathi news)

नगरसूल येथे आपले शिक्षण पूर्ण केल्यानंतर अमोलने कोपरगाव (जि. नगर) येथून इलेक्ट्रॉनिक डिप्लोमा पूर्ण केले. सततच्या शेतीच्या कामात गुंतलेले कुटुंब. आई-वडिलांचे जेमतेम शिक्षण. अशा परिस्थितीत अमोलने स्पर्धा परीक्षा तयारी करण्याचे ठरविले. शिक्षण घेताना आपली नाळ शेतीशी घट्ट ठेवून शेतीची कामे,वखरणी,नांगरणी,रात्री-अपरात्री पिकाला पाणी देणे.

मजूर मिळत नसल्याने कांदा लागवड, कापूस वेचणी ही अमोलची नित्याचीच कामे होते. ही कामे करत त्याने येवला येथील स्वामी विवेकानंद अभ्यासिकेमध्ये नियमित अभ्यास केला. याच दरम्यान त्याने वैद्यकीय शिक्षण संशोधन व आयुष्य संचालनालय विभागातर्फे निघालेल्या परीक्षेत वाहन चालक पदासाठी अर्ज केला. (latest marathi news)

या परीक्षेचा निकाल नुकताच लागला. परीक्षेत अमोल याने राज्यात प्रथम क्रमांक पटकाविला. अमोलच्या या यशाबद्दल स्वामी विवेकानंद अभ्यासिकेचे संचालक राहुल जाधव, किशोर गाडेकर, अविनाश कोटमी आणि विद्यार्थ्यांनी त्याचा सत्कार केला.

''कुटुंबाला हातभार म्हणून मिळालेली संधी समाजाच्या सेवेसाठी सत्कारणी लावीन. ग्रामीण माणसांच्या सेवेसाठी मी कटिबद्ध राहील.''-अमोल खैरनार